Ես պատրաստ եմ գնալ Կիև, բայց՝ նաև Մոսկվա մեկնելու պայմանով. Հռոմի պապ
Հռոմի պապ Ֆրանցիսկոսն ասել է, որ պատրաստ է Կիև գնալ միայն այն պայմանով, որ իրեն Մոսկվայում էլ ընդունեն։ Արգենտինական La Nacion թերթին տված հարցազրույցում նա ընդգծել է, որ այս հարցում անհնարին ոչինչ չի տեսնում, գրում է news.ru-ն։
Նրա խոսքով՝ ամեն ինչ կախված է ՌԴ նախագահ Վլադիմիր Պուտինից։
«Ես պատրաստ եմ գնալ Կիև. ես ուզում եմ գնալ Կիև, բայց՝ նաև Մոսկվա մեկնելու պայմանով։ Կամ երկու տեղն էլ գնում եմ, կամ ոչ մեկը։ Դա անհնարին չէ... Մենք հույս ունենք, որ մենք կարող ենք դա անել, այո: Ես չեմ փակել այդ դուռը... Գուցե նա (Պուտինը) ինչ-որ տեղ կշեղվի և կբացի այն, չգիտեմ»,- ասել է Ֆրանցիսկոս պապը։
Պոնտիֆիկոսը խոստովանել է, որ փորձում է դիվանագիտական կապեր հաստատել Ռուսաստանի և Ուկրաինայի միջև։ Միաժամանակ նա խոստովանել է, որ չի հավատում Վատիկանում Պուտինի և Ուկրաինայի նախագահ Զելենսկու երկկողմ հանդիպման անցկացման հավանականությանը։
Ավելի վաղ Հռոմի պապը հակամարտող կողմերին կոչ էր արել հրաժարվել այլ պետությունների ռազմական օգնությունից ու արդար խաղաղություն հաստատել։