Ընտրությունները քաղաքական են, որքան էլ իշխանությունը փորձի ասֆալտի ընտրություն ներկայացնել․ Երվանդ Թարվերդյան (տեսանյութ)
Ընտրությունները քաղաքական են, որքան էլ իշխանությունը փորձի ասֆալտի ընտրություն ներկայացնել։
«Կիզակետում Արկադի Գրիգորյանի հետ» հաղորդման ժամանակ ասել է «Միացյալ Հայաստան» կուսակցության հիմնադիր-նախագահ, Երևանի քաղաքապետի թեկնածու Երվանդ Թարվերդյանը․
«Երևանի ավագանու ընտրությունները լուրջ քաղաքական ընտրություններ են։ Իշխանությանը հեռացնելը մեզ համար նպատակ չէ, դա կլինի մեր գալու հետևանք։ Պետք է նայել ոչթե արած ասֆալտը կամ նորոգած վերելակը, այլ այն, թե նրանք իրենց ծրագրի քանի տոկոսն են իրագործել։ Քաղաքացին խուսափելով նախկինների վերադարձից, դժգոհ է այսօրվա կառավարման մեթոդիկայից։
Խիստ կասկածում եմ, որ իշխանությունը 50 տոկոսից ավելին կստանա։ Եթե իշխանությունը հաղթի Երևանում, կասեն՝ ինչ անում ենք, լավ ենք անում, քաղաքական մոնոպոլիա կլինի։ Եթե 50 տոկոսից ավելի ձայն ստանանք, փորձելու եմ հասնել երկրում արտահերթ ընտրությունների»,-նշել է Թարվերդյանը։
Նա ասել է, որ ավագանիում կոալիցիայի չեն գնա, կհամագործակցեն քաղաքապետի հետ, սակայն քաղաքապետը չի աշխատելու «ինչ ուզում, անում եմ» տրամաբանությամբ։ Ընտրվելու դեպքում «Միացյալ Հայաստանը» նախատեսում է սկսել գլոպալ հարցերից՝ քաղաքի զարգացման կոնցեպտի, գլխավոր հատակագծի մշակում։ Երվանդ Թարվերդյանի խոսքով, այնպես են անելու, որ երևանցին մասնակցի քաղաքի կառավարմանը։
Հարցազրույցն ամբողջությամբ՝ տեսանյութում․