Մոսկվան արձագանքել է Պետդեպի խոսնակի՝ Ղարաբաղի իրավիճակի ու Հայաստանի մասին հայտարարություններին
«Վաշինգտոնին կոչ ենք անում ձեռնպահ մնալ ծայրահեղ վտանգավոր խոսքերից ու գործողություններից, որոնք նպաստում են Հայաստանում հակառուսական արհեստական տրամադրությունների ուժեղացմանը», - Ռուսաստանի ԱԳՆ Տելեգրամ էջի համաձայն՝ ասել է Անտոնովը և կրկնել Արտգործնախարարության երեկվա հայտարարության թեզերը՝ ԱՄՆ-ի և նրա դաշնակիցների հիմնական խնդիրը ոչ թե իրավիճակի նորմալացումն է և Անդրկովկասի խաղաղ զարգացումը, այլ Ռուսաստանին ռազմավարական վնաս հասցնելը, Եվրասիական տարածքը ապակայունացնելու մտադրությունը՝ հեռանկարում տարածաշրջանից Ռուսաստանին դուրս մղելը։
Ռուսաստանի դեսպանի ասելով՝ ամերիկացիները, ըստ էության, կրկնում են հայ քաղաքական գործիչների հրապարակային, ոչ կառուցողական հայտարարությունները, որոնց նպատակը ներքին և արտաքին քաղաքականությունում սեփական սխալների պատասխանատվությունից հրաժարվելն է։
Մեթյու Միլլերի ասուլիսին, մասնավորապես միջազգային առաքելություն ստեղծելու հարցին, արձագանքել է Ռուսաստանի նախագահի մամուլի խոսնակ Դմիտրի Պեսկովը, ըստ էության, պաշտպանելով Ադրբեջանի շահերը։
«Լեռնային Ղարաբաղում միջազգային առաքելության ստեղծումը հնարավոր է բացառապես Բաքի համաձայնությամբ», - այսօր ասել է Կրեմլի խոսնակը։
Պետդեպարտամենտի խոսնակը սեպտեմբերի 25-ի բրիֆինգում ասել է, որ Միացյալ Նահանգները մտահոգված է Լեռնային Ղարաբաղում ստեղծված իրավիճակով և այդ կապակցությամբ կարևորել երեք դրույթներ. - «Առաջին՝ առկա հրադադարը պահպանվի, հետագա ռազմական գործողություններ չլինեն։ Երկրորդ՝ Լեռնային Ղարաբաղի ժողովրդի հումանիտար կարիքները բավարարվեն և երրորդ, որ Ադրբեջանն ու Հայաստանը հասնեն կայուն խաղաղության համաձայնագրի»։
Առկա իրավիճակի մասին նա նշել է․ - «Ինչ վերաբերում է տեղում հումանիտար իրավիճակին, ապա Լեռնային Ղարաբաղի էթնիկ հայ բնակիչները, եթե ցանկանում են, պետք է կարողանան մնալ իրենց տներում խաղաղ ու արժանապատիվ կերպով՝ հարգելով նրանց իրավունքներն ու անվտանգությունը։ Ով ցանկանում է հեռանալ ու վերադառնալ, նրանց պետք է անվտանգ տարանցում ապահովվի՝ չեզոք, անկախ երրորդ կողմի վերահսկողության ներքո։ Ադրբեջանը պատասխանատվություն է կրում պաշտպանելու քաղաքացիական անձանց և մարդասիրական վերաբերմունք ապահովել բոլորի նկատմամբ, ներառյալ նրանց, ում կասկածում է մարտիկներ լինելու մեջ»։
Անդրադառնալով ՄԱԿ-ի կամ միջազգային այլ մոնիթորինգ իրականացնելու Հայաստանի կոչերին և այդ հարցում ԱՄՆ-ի դիրքորոշմանը, Մեթյու Միլլերը ասել է, որ Լեռնային Ղարաբաղի բնակիչների անվտանգությունն ու իրավունքները երաշխավորելու համար պետք է միջազգային առաքելություն լինի։
«Մենք հավատում ենք, որ պետք է միջազգային առաքելություն լինի, որը կապահովի թափանցիկություն և կերաշխավորի Լեռնային Ղարաբաղի բնակիչներին ու միջազգային հանրությանը, որ նրանց իրավունքներն ու անվտանգությունը կպաշտպանվի՝ Ադրբեջանի հրապարակային հայտարարություններին համահունչ», - նշել է նա։
Ճշտող հարցին, թե արդյո՞ք այդ հարցը քննարկվում և ԱՄՆ-ն աշխատո՞ւմ է դրա վրա, Միլլերը պատասխանել է․ - «Այդ մասին ակտիվ քննարկումներ են եղել։ Մենք այդպիսի առաքելության կոչ ենք արել և աշխատում ենք մեր դաշնակիցների ու գործընկերների հետ այն ապահովելու համար»։
Ճեպազրույցում բավականին շոշափվել է Ղարաբաղի և Հայաստանի թեման, այդ թվում՝ անվտանգային ոլորտում Երևանի դժգոհությունը Ռուսաստանից, մյուս կողմից Մոսկվայի մեղադրանքներն ու քննադատությունները Հայաստանի իշխանությունների հասցեին։
Պետդեպարտամենտի խոսնակի խոսքերով՝ Ռուսաստանը ցույց տվեց, որ անվտանգության գործընկեր չէ, որի վրա կարելի է հույս դնել։
«Նրա վրա չի կարելի հույս դնել նաև որպես միջազգային գործընկերոջ», - ընդգծել է Միլլերը:
Մոսկվան Փաշինյանին քննադատում է նաև Ադրբեջանի տարածքային ամբողջականությունը ճանաչելու համար՝ այն համարելով ներկայիս իրավիճակի պատճառը։
Պետդեպարտամենտի ներկայացուցիչն ընդգծել է․ - «Ինչ վերաբերում է Ռուսաստանի կողմից այլ երկրների տարածքային ամբողջականությունն ու ինքնիշխանությունը հարգելու հարցին, ապա մենք նրա սեփական գործողություններով տեսնում ենք, որ Ռուսաստանը հանձնառու չէ այդ սկզբունքին»։
Մեթյու Միլլերը կարևոր է համարել, որ Հայաստանն ու Ադրբեջանը հասնեն կայուն խաղաղության համաձայնագրի։ Միացյալ Նահանգները աջակցում է դրան և հրապարակավ հայտարարել է, որ խաղաղության համաձայնագիրը հասանելի կլինի, եթե կողմերը կողմերը գնան դժվարին փոխզիջումների, «ինչը վերջին ամիսներին չենք տեսնում», ասել է ամերիկացի պաշտոնյան։
Նա նշել է, որ Ադրբեջանի նախագահ Ալիևն ու Հայաստանի վարչապետ Փաշինյանը հայտարարել են, թե պատրաստվում են գալիք շաբաթ հանդիպում ունենալ։
«Մենք կարևոր ենք համարում, որ նրանք հանդիպեն և վերջիվերջո հաղթահարեն երկու երկրներին բաժանող հակասությունները», - ասել է Պետդեպարտամենտի պաշտոնական ներկայացուցիչը։