Հայաստանի հիվանդանոցներում բուժում է ստանում ԼՂ-ից տեղահանված 319 քաղաքացի, 117-ի վիճակը ծանր է
Հայաստանի հիվանդանոցներում բուժում է ստանում Լեռնային Ղարաբաղից բռնի տեղահանված 319 քաղաքացի, 117-ի վիճակը գնահատվում է ծանր, 14-ինը՝ ծայրահեղ ծանր: Այս մասին «Հումանիտար կենտրոն»-ում ասուլիսում ասաց ՀՀ առողջապահության նախարար Անահիտ Ավանեսյանը՝ ներկայացնելով Լեռնային Ղարաբաղից ռազմական գործողությունների և պայթյունի հետևանքով ՀՀ տեղափոխված և մայրաքաղաքի տարբեր բժշկական կենտրոններում բուժում ստացող բուժառուների վերաբերյալ տվյալները:
«Այս պահին ունենք 319 բուժառու: Նրանցից 117-ի վիճակը գնահատվում է ծանր, 14-ինը՝ ծայրահեղ ծանր: Ուրախալի է, որ ունենք որոշակի դրական դինամիկա՝ հիվանդների վերակենդանացման բաժանմունքից տեղափոխում դեպի բաժանմունքներ և մի քանի դուրսգրումներ»,-ասաց նախարարը:
Նա նաև հավելեց, որ վերակենդանացման բաժանմունքներում իրենց բուժումն է շարունակում ստանալ 5 երեխա, 3 երեխա առողջական դրական դինամիկայով տեղափոխվել է բաժանմունք, ևս 1 նորածին հոկտեմբերի 5-ին դուրս է գրվել:
Ավանեսյանը նաև նշեց, որ Լեռնային Ղարաբաղից բռնի տեղահանված քաղաքացիներին կայցելեն բժշկական մոբիլ թիմեր, կիրականացնեն առաջին բուժզննում, կհավաքագրեն անհրաժեշտ տեղեկատվություն, կիրականացնեն կցագրում:
«Այսօրվանից արդեն սկսվել են մոբիլ թիմերի աշխատանքները: Եվ առաջիկայում, սիրելի հայրենակիցներ, ձեզ կայցելեն բժշկական մոբիլ թիմեր: Նրանք նախ կիրականացնեն առաջին բուժզննում, կհավաքագրեն անհրաժեշտ տեղեկատվություն՝ ձեր կարիքները գնահատելու և հետագայում դրանց ավելի հասցեական լուծում տալու համար: Ամենակարևորը՝ կիրականացնեն նաև կցագրման գործընթացը»,-ասաց Ավանեսյանը:
Առողջապահական բոլոր ծառայությունները պետպատվերի շրջանակում հասանելի են ԼՂ-ից բռնի տեղահանված անձանց, բայց այս մեխանիզմները գործարկելու համար շատ կարևոր է առաջնային օղակում կցագրվելը: ԼՂ-ից բռնի տեղահանված արդեն 11 հազար հայրենակիցներ կցագրվել են: Ըստ նախարարի՝ դա հնարավոր է դարձնում թե պլանային բուժօգնությունը, թե դեղորայքի տրամադրումը քրոնիկ հիվանդությունների պարագայում: Հիվանդանոցային բժշկական օգնության կարիքի դեպքում էլ նրանք կարող են ուղեգրման սկզբունքով ազատ կերպով օգտվել այդ ծառայությունից:
Մոբիլ թիմերում ներգրավված են լինելու նաև հոգեբաններ:
Ավանեսյանը կարևորեց նաև հնարավորինս արագ կերպով բնականոն պատվաստումների գործընթացի գործարկումը, առաջիկայում գրիպի ակտիվացման սեզոն է, Հայաստանում նաև կարմրուկի որոշակի բռնկում կա, կորոնավիրուսն էլ չի անհետացել: