Գյումրիում պարեկը, վտանգելով իր կյանքը, վնասազերծել է հրշեջների վրա հարձակվող զինված տղամարդուն. նա կասկածվում է ավտոմեքենան հրկիզելու մեջ
Այսօր՝ հոկտեմբերի 24-ին, արտակարգ դեպք է տեղի ունեցել Շիրակի մարզում: Ժամը 16:10-ի սահմաններում ՀՀ ներքին գործերի նախարարության փրկարար ծառայության «9-11» ճգնաժամային կառավարման ազգային կենտրոն ահազանգ է ստացվել, որ Գյումրի քաղաքի Պարույր Սևակ փողոցի 13 շենքի բակում կայանված ավտոմեքենա է այրվում:
Ինչպես հայտնում է ֆոտոլրագրող Գագիկ Շամշյանը, օպերատիվորեն դեպքի վայր են ժամանել Գյումրու թիվ 1-ին հրշեջ-փրկարարական ջոկատից 1 մարտական հաշվարկ:
Հրշեջներին հաջողվել է նախ կանխել կրակի տարածումը, ապա մարել են Opel Astra մակնիշի ավտոմեքենայում առաջացած հրդեհը:
Օպերատիվորեն ժամանել են նաև ՀՀ ՆԳՆ ոստիկանության պարեկային ծառայության Շիրակի մարզի գումարտակի պարեկները` գումարտակի հրամանատար Կարեն Կյուրեղյանի, գումարտակի ծառայության ավագ տեսուչ Աղասի Խաչատրյանի գլխավորությամբ: Ժամանել են նաև ոստիկանության Մուշի բաժնի օպերատիվ խումբը` օրվա պատասխանատու հերթապահի գլխավորությամբ:
Ֆոտոլրագրողը հայտնում է, որ երբ հրշեջները փորձել են մարել կրակը, մի տղամարդ՝ դանակով զինված, նախ կտրել է հրշեջ ավտոմեքենային միացված փողրակը, ապա խոչընդոտել ու արգելել է հրշեջների աշխատանքը:
Ի վերջո, պարեկներից մեկին հաջողվել է իր կյանքը վտանգելով մոտենալ դանակով և, ըստ նախնական տեղեկությունների, զենքի նմանվող առարկայով զինված տղամարդուն, հաջողությամբ վնասազերծել նրան, որից հետո ոստիկանության Մուշի բաժնի ծառայողների հետ նրան ձերբակալել ու տեղափոխել են ոատիկանության Մուշի բաժին:
Ըստ նախնական տեղեկությունների՝ տղամարդը Շիրակի մարզի բնակիչ՝ 43-ամյա Ա. Ա.-ն է, ով կասկածվում է ավտոմեքենան հրկիզելու մեջ, իսկ նրան վնասազերծած պարեկը Արթուր Մհերյանն է՝ ՀՀ ՆԳՆ ոստիկանության պարեկային ծառայության Շիրակի մարզի գումարտակի 2-րդ վաշտի 1-ին դասակի կրտսեր պարեկը:
Դեպքի փաստով ոստիկանության Մուշի բաժնում փաստաթղթեր են ձևակերպվում:
Լուսանկարները՝ Խաչիկ Գևորգյանի
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
The post Գյումրիում պարեկը, վտանգելով իր կյանքը, վնասազերծել է հրշեջների վրա հարձակվող զինված տղամարդուն. նա կասկածվում է ավտոմեքենան հրկիզելու մեջ appeared first on ԳԱԼԱ.