Զելենսկին կոչ է արել չսպասել պատերազմի արագ ավարտին
Ուկրաինայի նախագահ Վլադիմիր Զելենսկին հայտարարել է, որ ռուս-ուկրաինական ռազմական հակամարտությունը արագ չի ավարտվի։ Նա նաև հորդորել է ռազմաճակատում իրադարձությունների մշտական փոփոխություններ չակնկալել, ինչպես դա տեղի է ունենում ֆիլմերում։
«Չգիտես ինչու, մարդիկ դրան վերաբերվում են ինչպես ֆիլմի, և ակնկալում են, որ իրադարձություններում երկար դադարներ չեն լինի, իրենց աչքի առաջ անընդհատ պատկերը փոխվի, ամեն օր անակնկալներ կլինեն։ Բայց մեր զինվորների համար սա կինո չէ, սա մեր կյանքն է։ Սա ամենօրյա քրտնաջան աշխատանք է»,- ասել է Վլադիմիր Զելենսկին Fox News-ին տված հարցազրույցում։
«Եվ ամեն ինչ այնքան արագ չի ավարտվի, որքան մենք կցանկանայինք, բայց մենք իրավունք չունենք հանձնվելու: Եվ մենք սա չենք անի»,- հավելել է նա։
Ուկրաինայի զինված ուժերի գլխավոր հրամանատար Վալերի Զալուժնին նոյեմբերի սկզբին The Economist-ի համար հոդվածում գրել էր, որ հակամարտությունը «մտել է փակուղի»։ Նրա կարծիքով՝ իրավիճակը ճակատում կարող է վերածվել «դիրքային պատերազմի», որը «կարող է ձգձգվել տարիներով և հյուծել» Ուկրաինան։ Հոդվածի հրապարակումից հետո Վլադիմիր Զելենսկին ասել էր, որ Ռուսաստանի հետ ռազմական հակամարտությունը սառեցնելը վատ որոշում կլինի։ Նա նաև ասել էր, որ ռազմական գործողությունները պետք է դադարեցվեն, ոչ թե սառեցվեն։