Տաջիկստանի նախագահը ժամանել է Մոսկվա, որտեղ կբանակցի Պուտինի հետ
Տաջիկստանի նախագահ Էմոմալի Ռահմոնը պաշտոնական այցով ժամանել է Ռուսաստանի Դաշնություն, երեքշաբթի հայտնել է Տաջիկստանի ղեկավարի մամուլի ծառայությունը։
Նախագահին այցի ընթացքում ուղեկցում են փոխվարչապետը, արտաքին գործերի նախարարը, նախագահի արտաքին կապերի գծով օգնականը, պաշտպանության, ներքին գործերի, տնտեսական զարգացման և առևտրի, արդյունաբերության և նոր տեխնոլոգիաների, էներգետիկայի և ջրային ռեսուրսների, տրանսպորտի, աշխատանքի, միգրացիայի և զբաղվածության նախարարները։
Նախօրեին Կրեմլի մամուլի ծառայությունը հայտնել էր, որ նոյեմբերի 21-ին Մոսկվայում կկայանան բանակցություններ ՌԴ նախագահ Վլադիմիր Պուտինի և Տաջիկստանի նախագահ Էմոմալի Ռահմոնի միջև։
«Բանակցությունների արդյունքում կստորագրվեն մի շարք կարևոր երկկողմ փաստաթղթեր, պետությունների ղեկավարները հանդես կգան նաև հայտարարություններով լրատվամիջոցների համար»,- ասված է հաղորդագրության մեջ։