Կարելի է որոշ նախարարություններ քաղաքից դուրս տեղակայել, բայց ես երիտասարդ չեմ, թող ԱԺ-ն մնա իր տեղում, հեռու չգնամ. Աղազարյան
«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը – Պարո՛ն Աղազարյան, ի պատասխան ձեր քաղաքական թիմի՝ մայրաքաղաքում պետք է ոչ մի բուհ չլինի որոշմանը, հնչում են առաջարկներ, որ կառավարության, խորհրդարանի ու ընդհանրապես վարչական շենքերը տեղափոխեք քաղաքից դուրս, բայց համալսարանները մնան տեղում։ Ինչպե՞ս եք վերաբերվում այս առաջարկին ու նաև համակարծի՞ք եք ձեր թիմի […]
The post Կարելի է որոշ նախարարություններ քաղաքից դուրս տեղակայել, բայց ես երիտասարդ չեմ, թող ԱԺ-ն մնա իր տեղում, հեռու չգնամ. Աղազարյան first appeared on MediaLab Newsroom-Laboratory.
«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը
– Պարո՛ն Աղազարյան, ի պատասխան ձեր քաղաքական թիմի՝ մայրաքաղաքում պետք է ոչ մի բուհ չլինի որոշմանը, հնչում են առաջարկներ, որ կառավարության, խորհրդարանի ու ընդհանրապես վարչական շենքերը տեղափոխեք քաղաքից դուրս, բայց համալսարանները մնան տեղում։ Ինչպե՞ս եք վերաբերվում այս առաջարկին ու նաև համակարծի՞ք եք ձեր թիմի որոշմանը։
– Հարցի իմաստը չեմ հասկանում, դա այդքան կարևոր հա՞րց է, որ դրան պատասխանեմ։ Ես ինքս առաջարկում էի, որ մայրաքաղաքը տեղափոխվի՝ բոլոր այդ պետական կառույցներով, բուհերով։ Հիմա կառավարությունը այդ որոշումն է կայացրել, բնականաբար ես էլ՝ որպես թիմի անդամ, պաշտպանում եմ դա ու, ինչքան կարող եմ, պետք է իմ ներդրումն ունենամ այդ ծրագրի իրականացման համար։
Ինչ վերաբերում է այդ առաջարկին, ապա ասեմ, որ այդպիսի հարց շոշափում ենք, այնպես որ, կարող է պատահի, որ կառավարական որոշ շենքեր տեղափոխվեն քաղաքից դուրս՝ այն բեռնաթափելու համար։
Իսկ այդ առաջարկություն անողները ինչ-որ գնահատական ունե՞ն մեր կրթության մակարդակի հետ կապված: Ես շատ վատ գնահատական ունեմ մեր կրթության մակարդակի հետ կապված՝ հիմա էլ, 15 տարի առաջ էլ։ Հիմա այս ճանապարհով միգուցե կառավարությունը մտածում է այնպիսի իրավիճակ ստեղծել, որ կրթության որակը լավացնի, միգուցե մասնագետները գտել են, որ Ակադեմիական քաղաքի ստեղծումն իրապես կարող է ազդի կրթության որակի վրա։
– Իհարկե ունեն գնահատական, նրանք ևս ընդգծում են, որ կրթության համակարգում առկա են խնդիրներ, բայց նաև նշում են, որ կառավարության առաջարկած այս տարբերակով դրանք չեն լուծվելու, միգուցե ավելի վատանան։
– Այ դա վիճելի հարց է, հուսանք, որ իրենք կսխալվեն, ու այն կտա դրական արդյունք, ու բոլորս գոհ կլինենք այս որոշումից։
– Իսկ համաձա՞յն եք, որ կառավարության շենքը, ձեր պարագայում՝ ԱԺ-ի շենքը տեղափոխվեն քաղաքից դուրս, պարո՛ն Աղազարյան։
– Հա՛, ես համաձայն եմ, որ կառավարական շենքերը, ինչ-որ իմաստով նաև խորհրդարանի շենքը, բայց ոչ կենտրոնացված ձևով, այլ մի քիչ ուրիշ ձևով՝ քաղաքը բեռնաթափելու նպատակով, այո՛, ես համաձայն եմ, իհարկե։ Բայց այդ իմաստով կենտրոնացմանն այդքան էլ համաձայն չեմ, որ բոլորը մի տեղում լինեն։ Կարելի է, օրինակ՝ որոշ նախարարություններ քաղաքից դուրս մի հատվածում տեղակայել, մի մասը՝ այլ, բայց քանի որ ես երիտասարդ չեմ, թող ԱԺ-ն մնա իր տեղում, ես շատ հեռու չգնամ։
– Կարծիքներ են հնչում, որ ձեր քաղաքական թիմը որոշել է բուհերը տեղափոխել քաղաքից դուրս, որ եղած շենքերը ֆինանսական նպատակով օգտագործի, քանի որ կենտրոնում շենքերի գներն ավելի բարձր են։
– Չէ, դա իրականությանը չի համապատասխանում, որովհետև եթե մենք այսօրվա շուկայական գներով հաշվենք այդ բոլոր շենքերի գումարային արժեքը, ապա դրանք այնպիսի թիվ չեն կազմի, որ վճռական նշանակություն ունենան այդ իմաստով, այն դեպքում, երբ Ակադեմիական քաղաքի կառուցման համար են հսկայական գումարներ պետք։ Այնպես որ, այստեղ ֆինանսական օգուտի մասին խոսք լինել չի կարող։
– Պարո՛ն Աղազարյան, իսկ հնարավո՞ր է, որ դուք, օրինակ՝ կառավարական շենքերը քաղաքից դուրս տանելու նախագծով հանդես գաք։
– Մեր մեջ այդ քննարկումներն ընթանում են, բայց նման նախագծով հանդես չեմ գա, ես հանդես էի եկել մայրաքաղաքը տեղափոխելու առաջարկով, որն իմ գործընկերները չընդունեցին։ Մայրաքաղաքը տեղափոխել ասելով՝ նկատի ունեի, որ Հրազդանի մոտերքը մի հատ փոքրիկ քաղաք կառուցել, որտեղ տեղակայված կլինեին բուհերը, կառավարական շենքերը, որպեսզի Երևանի ծանրաբեռնվածության հարցը ինչ-որ իմաստով լուծվեր, որովհետև օր օրի տեսնում ենք, որ քաղաքը ծանրաբեռնվում է, իսկ դա թոթափելու համար լուծումներ են պետք։ Հիմա Ակադեմիական քաղաքի ստեղծումը որքանով կնպաստի այդ լուծմանը, դա էլ ժամանակը ցույց կտա։
Քրիստինե Աղաբեկյան
MediaLab.am
The post Կարելի է որոշ նախարարություններ քաղաքից դուրս տեղակայել, բայց ես երիտասարդ չեմ, թող ԱԺ-ն մնա իր տեղում, հեռու չգնամ. Աղազարյան first appeared on MediaLab Newsroom-Laboratory.