ნიკოლოზ ბასილაშვილი დოჰას ტურნირზე ჩემპიონი გახდა და საჩემპიონო კომენტარისას შვილს მიმართა
ყატარში გამართულ პრესტიჟულ ტურნირზე, რომლის საპრიზო ფონდიც 1 153 560 იყო, ნიკოლოზ ბასილაშვილმა ფინალამდე ოთხი ეტაპი გაიარა. შეჯიბრება ავსტრალიელი ჯონ მილმანის ძლევით (6:4, 6:2) გახსნა. შემდეგ მოუგო ტუნისელ მალექ ჯაზირს (6:2, 6:2). მეოთხედფინალში მოახდინა ტურნირის უდიდესი სენსაცია - დაამარცხა თანამედროვე მსოფლიო ჩოგბურთის ლეგენდა, შვეიცარიელი როჯერ ფედერერი (3:6, 6:1, 7:5). ნახევარფინალში კი ამერიკელ ტეილორ ფრიტცს სძლია (7:6, 6:1).
დაჯილდოვების ცერემონიალისას გაკეთებულ ტრადიციულ კომენტარში, ქართველმა ჩოგბურთელმა ტრადიციული მადლობების შემდეგ, ორგანიზატორებს სთხოვაა, რომ სურდა, რამდენიმე სიტყვა ქართულად ეთქვა.
„ლუკას, მამიკო, მინდა დაიმახსოვრო, შენ ხარ ჩემთვის ყველაზე ძვირფასი ადამიანი. ძალიან მიყვარხარ და მენატრები“ - განაცხადა ნიკოლოზ ბასილაშვილმა.
საქართველოს ყველაზე წარმატებულ ჩოგბურთელს დოჰას ტურნირამდე სპორტულ კარიერაში ხანგრძლივი ჩავარდნა ჰქონდა. ამ წარუმატებლობის ერთ-ერთი მიზეზი მისი ოჯახური პრობლემაა. ბასილაშვილს ყოფილი მეუღლის მიმართ განხორციელებულ ფიზიკურ ძალადობაში ედება ბრალი და გამოძიება ჯერ კიდევ გრძელდება.