გამოძიება დაიწყო ენმ-ის ოფისზე გაკრულ ნიკა მელიას ბანერზე იარაღიდან სროლის ფაქტზე
როგორც შსს აცხადებს, გამოძიება მიმდინარეობს საქართველოს სისხლის სამართლის კოდექსის 187-ე და 236-ე მუხლებით, რაც სხვისი ნივთის დაზიანებას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს. განცხადებაში ვკითხულობთ, რომ აღნიშნულ ფაქტთან დაკავშირებით, შინაგან საქმეთა სამინისტროსთვის არ მოუმართავთ. გამოძიება მედიაში გასული ინფორმაციის საფუძველზე დაიწყო. ტარდება ყველა შესაბამისი საგამოძიებო და საპროცესო ღონისძიებები.
„ერთიანი ნაციონალური მოძრაობის“ წევრმა ბაჩო დოლიძემ „მთავარ არხს“ უთხრა, რომ ფაქტი წარმოადგენს საშიში კრიმინალური ხასიათის პროვოკაციას.
„რამდენჯერმე გაისროლეს ოფისის, კერძოდ, ბანერის მიმართულებით. არაფერ კარგს არ მოასწავებს მსგავსი ტიპის ქმედებები, ჩვენ უკვე ვნახეთ, ნიკას საარჩევნო უბანთან, როდესაც იარაღის ტრიალი იყო დაფიქსირებული, თუმცა მერე სამართალდამცველების და შემდგომ სასამართლოს გადაწყვეტილებით, თითქოს სათამაშო იარაღი იყო. ასე რომ, დიდი იმედი არ გვაქვს, რომ ეს იქნება ობიექტურად გამოძიებული“, - თქვა დოლიძემ.
ოპოზიციური პარტიის ლიდერი ნიკა მელია 23 თებერვალს, დილას, 10 საათამდე "ერთიანი ნაციონალური მოძრაობის" ოფისში საპოლიციო ძალებმა დააკავეს. მის დაკავებას მოჰყვა საერთაშორისო საზოგადოების მწვავე გამოხმაურება.
შსს-ს თბილისის საქალაქო სასამართლომ დაავალა ნიკა მელიასთვის 17 თებერვალს შეფარდებული პატიმრობის გადაწყვეტილების აღსრულება. მელიას პატიმრობა გირაოს გადაუხდელობის გამო შეუფარდეს.