გია ვოლსკი: ოპონენტებს არ ჰქონიათ ამ კრიზისის განმუხტვის ინტერესი
„ულტიმატუმი არის, რომ ვაღიაროთ ქვეყანაში პოლიტპატიმრების არსებობა, თავზე ნაცარი დაიყაროს ხელისუფლებამ, გადადგეს და ჩაატაროს იმდენი არჩევნები, ვიდრე სააკაშვილი არ იქნება არჩეული და საპარლამენტო ტრიბუნაზე არ დალევს ყავას თუ ჩაის“, - უთხრა დღეს მედიას ვოლსკიმ.
გია ვოლსკის შეფასებით, ოპოზიციას კრიზისის განმუხტვის ინტერესი არ აქვს:„მშრალი ნაშთი, რაც გვაქვს, ეს არის აკო მინაშვილის, იგივე მიხეილ სააკაშვილის განცხადება, რომ ულტიმატუმი არის მთავარი თემა და კომპრომისი არის ის, რომ მოლაპარაკების მაგიდასთან დასხდნენ ამ ულტიმატუმით და სხვა არაფრით“.
„ქართული ოცნების“ ერთ-ერთი ლიდერი „მეორე მშრალ ნაშთად“ განიხილავს ევროკავშირის პოზიციას, რომ არჩევნები არ გაყალბებულა და არ არსებობს დემოკრატია პარლამენტს მიღმა: „და მესამე, რომ ყველაფერი შეიძლება გაკეთდეს, რათა პარლამენტის წევრებმა, რომლებიც პარლამენტში იქნებიან, მიიღონ ამომწურავი პასუხი საკითხებზე, რომელიც ეხება არჩევნებს და ამის ყველა რესურსი შესთავაზა უმრავლესობამ“.
გია ვოლსკის თანახმად, შეთავაზება, რომ საგამოძიებო კომისიას უხელმძღვანელებდა ოპოზიციის წარმომადგენელი, არის ის მნიშვნელოვანი ფაქტორი, რომელიც ოპოზიციის მიერ სრულად იყო იგნორირებული.
წუხელ, თბილისში შეთანხმების გარეშე დასრულდა ევროკავშირის მედიაციით, ხელისუფლებასა და ოპოზიციას შორის მიმდინარე მოლაპარაკება. გამთენიისას საქართველო დატოვა ევროპული საბჭოს პრეზიდენტის პირადმა წარმომადგენელმა, კრისტიან დანიელსონმა.
12 მარტიდან, დანიელსონმა ოპოზიციის და ხელისუფლების წარმომადგენლებთან გამართა არაერთი შეხვედრა როგორც ცალ-ცალკე, ისე ერთად. პროცესში მონაწილეობდნენ ევროკავშირისა და აშშ-ის ელჩები, კარლ ჰარცელი და კელი დეგნანი.
მთავარი, რასაც ოპოზიცია მოითხოვს, პოლიტპატიმრების - ნიკა მელიას და გიორგი რურუას გათავისუფლება და ვადამდელი საპარლამენტო არჩევნებია. "ქართული ოცნება" პოლიტიკური მართლმსაჯულების არსებობას უარყოფს და ვერც ვადამდელი არჩევნების საფუძველს ხედავს, რის დასტურადაც მოჰყავს თავად ევროკავშირის შეფასება. ევროკავშირის მედიაციით მიმდინარე მოლაპარაკების უშედეგოდ დასრულებაში მხარეები ერთმანეთს ადანაშაულებენ.
ევროკავშირის მაღალჩინოსანი, შვედი დიპლომატი კრისტიან დანიელსონი 12 მარტიდან აგრძელებდა ევროპული საბჭოს პრეზიდენტ შარლ მიშელის ინიციატივით და მისი პირადი მონაწილეობით 1 მარტს, თბილისში დაწყებულ მედიაციის პროცესს. განსახილველ საკითხებს შორის იყო სასამართლოს და საარჩევნო სისტემის რეფორმაც.