"იმედის" ეგზიტპოლზე დაყრდნობით "ქართული ოცნება" გამარჯვებას ზეიმობს
"კიდევ ერთხელ მინდა მადლობა გადავუხადო ჩვენს მხარდამჭერებს, ჩვენს ამომრჩევლებს, მინდა მივმართო ჩვენს ოპონენტებს, რომ დღეს დავასრულეთ პოლარიზაცია, სიძულვილის და სიცრუის ეპოქა და ხვალიდან უნდა დაიწყოს სიმშვიდის, განვითარების ხანა. კიდევ ერთხელ გილოცავთ და გისურვებთ მშვიდობას და სტაბილურობას", - თქვა ირაკლი ღარიბაშვილმა.
"მადლობა თითოეულ თქვენგანს. 10-ათასობით ადამიანი იყო ჩართული საარჩევნო კამპანიაში და ძალიან მიხარია, რომ ეს ყველაფერი დაფასდა, თითოეულ ჩვენგან დაგვიფასდა გამარჯვება... ჩვენ 10 წლის წინ, როდესაც ბიძინა ივანიშვილმა დააფუძნა "ქართული ოცნება", გამარჯვების არავის არ სჯეროდა, თუმცა იმის შემდეგ მოვიპოვეთ ზედიზედ მე-8 გამარჯვება და დიდი გამარჯვებები კიდევ წინ არის. გაუმარჯოს დღეს და ჩვენს ჩვენს შემდეგ გამარჯვებებს", - თქვა ირაკლი კობახიძემ.
ამომრჩეველს მადლობა გადაუხადა ამავე პარტიის თბილისის მერობის კანდიდატმა კახა კალაძემ.
"მინდა სრულიად საქართველოს მივულოცო დღევანდელი დღე, განსაკუთრებით დიდი მადლიერება გამოხატო თბილისის და თბილისელების მიმართ. დიდი მადლობა ამ ნდობისთვის და მხარდაჭერისთვის და როგორ ყოველთვის ვამბობდით ამ საარჩევნო კამპანიის დროს, ახლაც გავიმეორებ, რომ მზად ვარ ვემსახურო ჩემს თანაგუნდელებთან ერთად ამ ქალაქს... დღეს რას სჭირდება ყველაზე მეტად ჩვენს ქვეყანას არის სიმშვიდე, სტაბილურობა - შესაბამისად, დღევანდელი ჩვენი წარმატება მოგვცემს ამ ყველაფრის შესაძლებლობას, რომ შემდეგი 3 წელი მოვახდინოთ ქვეყნის სტაბილური განვითარება, რომ კეთილდღეობა იგრძნოს თითოეულმა ჩვენმა მოქალაქემ..." - თქვა კახა კალაძემ.
ტელეკომპანია "იმედის" დაკვეთით ჩატარებული საზოგადოებრივი აზრის კვლევით, "ქართული ოცნებამ" თვითმმართველობის არჩევნებში 47,6% აიღო. ამავე კვლევის მიხედვით, თბილისში მეორე ტური არ იმართება და კახა კალაძე ხმების ნახევარზე მეტს პირველივე ტურში აგროვებს.
განსხვავებულია "ფორმულას" დაკვეთით ჩატარებული ეგიტპოლის შედეგები. ამ კვლევით, თბილისში მერის ასარჩევად თბილისში მეორე ტური იმართება.
თუმცა, ამავე კვლევის მიხედვით, "ქართული ოცნება" საქართველოს მასშტაბით 43 პროცენტზე მეტს აგროვებს.
ტელეკომპანია „მთავარი არხის“ დაკვეთით ”IPSOS-გლობალის მიერ ჩატარებული ეგზიტპოლის თანახმად, „ქართულმა ოცნებამ“, 17:00 საათის მონაცემებით, ხმების 38.6 %მიიღო; ხოლო „ნაციონალურმა მოძრაობამ“ - 33%.
დედაქალაქის მერობის კანდიდატებს შორის, ნიკა მელია ლიდერობით, მეორე ტურის საჭიროება გამოიკვეთა. თბილისში ხმები ასე გადანაწილდა:
40.8% - ნიკა მელია
40.2% - კახა კალაძე
8.7% - გიორგი გახარია