"ეწევა ელექტრონულ სიგარეტს" - დაარღვია მინისტრმა სააკაშვილის უფლებები?

საქართველოს იუსტიციის მინისტრმა, რატი ბრეგაძემ ჟურნალისტის კითხვის საპასუხოდ პრესკონფერენციაზე თქვა, რომ პატიმრობაში მყოფი მიხეილ სააკაშვილი ელექტრონულ სიგარეტს ეწევა. საქართველოს მესამე პრეზიდენტის ადვოკატი ამბობს, რომ ბრეგაძემ სააკაშვილის პერსონალური მონაცემები უნებართვოდ გააჟღერა.


"ელექტრო სიგარეტებს მოიხმარს დიდი რაოდენობით... ჩვენთვის როგორც ცნობილი გახდა, დაახლოებით 300-მდე ელექტრო სიგარეტი მოიხმარა. როგორ ფიქრობთ, ბატონო რატი, ამან ხომ არ გამოიწვია მის ჯანმრთელობაზე უარყოფითი გავლენა", - იკითხა POS TV-ს ჟურნალისტმა.


რატი ბრეგაძემ დაადასტურა, რომ სააკაშვილი ელექტრონულ სიგარეტს ეწევა და ჟურნალისტს ასე უპასუხა:


"კონკრეტულად რა იწვევს ჯანმრთელობაზე დადებით თუ უარყოფით შედეგს, ამასთან დაკავშირებით, მე, როგორც არაექიმს პასუხის გაცემა გამიჭირდება, თუმცა ეგ ინფორმაცია შემიძლია დაგიდასტუროთ, რომ იგი ნამდვილად ეწევა ელექტრონულ სიგარეტს". რადიო თავისუფლებას მიხეილ სააკაშვილის ადვოკატმა, შალვა ხაჭაპურიძემ უთხრა, რომ პერსონალური მონაცემების უნებართვოდ გაჟღერების გამო აპირებს მიმართოს პერსონალურ მონაცემთა დაცვის ინსპექტორის სამსახურს. "იუსტიციის მინისტრმა კანონი დაარღვია. მან გააჟღერა პერსონალური ინფორმაცია, მას ამის თქმის უფლება არ ჰქონდა... მე არ მაქვს [ელექტრონული სიგარეტის მოხმარებაზე] არანაირი ინფორმაცია, რომც მქონდეს, მისი ნებართვის გარეშე ვერ ვიტყვი", - ამბობს ხაჭაპურიძე.


რადიო თავისუფლება ამ საკითხზე პერსონალურ მონაცემთა დაცვის სამსახურიდან კომენტარს ელოდება, რომლითაც მასალა მოგვიანებით განახლდება.