რუსეთის დუმამ მხარი დაუჭირა სტრატეგიული შეტევითი შეიარაღების ხელშეკრულების შეჩერებას
401 ხმით მიღებული კანონპროექტით, ხელშეკრულებაში მონაწილეობის აღდგენის გადაწყვეტილებას რუსეთის პრეზიდენტი მიიღებს. რუსეთის პარლამენტის ქვედა პალატის, სახელმწიფო დუმის შემდეგ, კანონპროექტი უნდა დაამტკიცოს ზედა პალატამ - ფედერაციის საბჭომ.
21 თებერვალს, ფედერალური კრებისადმი მიმართვისას პრეზიდენტმა პუტინმა გამოაცხადა, რომ რუსეთი აჩერებს სტრატეგიული შეტევითი შეიარაღების ხელშეკრულების მოქმედებას, თავდაცვის სამინისტრომ კი უნდა უზრუნველყოს ბირთვული იარაღის გამოცდისთვის მზადყოფნა. იმავე დღეს დუმას წარედგინა შესაბამისი კანონპროექტი.
პუტინმა გადაწყვეტილება იმით ახსნა, რომ დასავლეთს რუსეთის სტრატეგიული მარცხი სურს და ამასთან, "მიძვრებიან" რუსეთის ბირთვულ ობიექტებზე. როგორც პუტინმა თქვა, რუსეთი ხელშეკრულებას არ ტოვებს, მის მოქმედებას აჩერებს და ბირთვულ იარაღსაც იმ შემთხვევაში გამოცდის, თუ ამას აშშ გააკეთებს.
აშშ-რუსეთის ხელშეკრულება, რომელიც პუტინმა შეჩერებულად გამოაცხადა(СНВ-3), 2010 წელს გაფორმდა და ძალაში 2011 წელს შევიდა.
ამერიკელების მიერ New START-ად წოდებული ამ დოკუმენტის საფუძველზე შემცირდა ორივე ქვეყნის არსენალში არსებული ბირთვული იარაღი და ბალისტიკური რაკეტები და განისაზღვრა ურთიერთკონტროლის მექანიზმები.
2021 წელს, ხელშეკრულების მოქმედების ვადა 5 წლით გაგრძელდა.