შსს-ს ცნობით, რუსეთის მოქალაქე დააკავეს აქციის დროს პოლიციის ავტომობილის დაზიანებისთვის
პოლიციამ თბილისში მიმდინარე საპროტესტო აქციების დროს სისხლის სამართლის დანაშაულის ჩადენის ბრალდებით კიდევ ერთი პირი დააკავა. საქართველოს შინაგან საქმეთა სამინისტროს(შსს) თანახმად, ის რუსეთის მოქალაქეა. სამინისტრო მხოლოდ მის ინიციალებს ასახელებს.
შსს-ს მიერ დღეს, 31 მარტს, გავრცელებული ინფორმაციით, „გამოძიებით დადგინდა, რომ ბრალდებულმა, რომელსაც სახე სპეციალური ნიღბით ჰქონდა დაფარული, 28 მარტს, რუსთაველის გამზირზე, აქციის მიმდინარეობისას, შინაგან საქმეთა სამინისტროს ბალანსზე რიცხული ავტომობილი მიზანმიმართულად დააზიანა და შემთხვევის ადგილიდან მიიმალა”.
შსს-ს თანახმად, რუსეთის მოქალაქის, 1995 წელს დაბადებული დ.კ.-ს იდენტიფიცირება „ცხელ კვალზე ჩატარებული საგამოძიებო ღონისძიებების” შედეგად მოხდა და ის თბილისში დააკავეს.
რუსეთის მოქალაქეს ბრალად ედება სხვისი ნივთის დაზიანება. სისხლის სამართლის კოდექსით, მსგავსი დანაშაული სამ წლამდე ვადით თავისუფლების აღკვეთას ითვალისწინებს.
2024 წლის ნოემბრიდან, მას შემდეგ, რაც საქართველოში დაიწყო ევროკავშირში ინტეგრაციის მხარდამჭერი აქციები, პოლიციამ სისხლის სამართლის სხვადასხვა ბრალდებით ათეულობით პირი დააკავა.
ასეულობით დემონსტრანტი დააკავეს ადმინისტრაციული სამართალდარღვევების ბრალდებით.
დაკავებულთა შორის რუსეთის მოქალაქეები ადრეც იყვნენ.
სამ თვეზე მეტია თბილისში საპროტესტო აქციები მიმდინარეობს ახალი საპარლამენტო არჩევნების და უკანონოდ დაკავებული დემონსტრანტების გათავისუფლების მოთხოვნებით.
საქართველოში აქციები მას შემდეგ დაიწყო, რაც 2024 წლის 28 ნოემბერს „ქართული ოცნების" მთავრობამ გამოაცხადა, რომ 2028 წლის ბოლომდე დღის წესრიგში აღარ დააყენებს ევროკავშირში გასაწევრიანებლად მოლაპარაკებების გახსნის საკითხს.
საპროტესტო გამოსვლები, განსაკუთრებით პირველ დღეებში, საპოლიციო ძალებმა არაერთხელ დაშალეს სპეცსაშუალებების გამოყენებით. ფიზიკურად გაუსწორდნენ აქციის ათეულობით მონაწილეს. ძალადობა იყო მედიის წარმომადგენლებზეც.
სამართალდამცავების მიერ უფლებამოსილების შესაძლო გადამეტების ფაქტებს იძიებს სპეციალური საგამოძიებო სამსახური, თუმცა ჯერჯერობით კონკრეტულად ვინმეს პასუხისმგებლობის შესახებ არ განუცხადებია.