ევროკავშირი მზად არის ამერიკულ ტარიფებს უპასუხოს
ევროკავშირს აქვს ძლიერი გეგმა, რომლითაც აშშ-ის მიერ ტარიფების ამოქმედებას უპასუხებს. ამის შესახებ ევროკომისიის პრეზიდენტმა ურზულა ფონ დერ ლაიენმა განაცხადა დღეს, 1 აპრილს, სტრასბურგში, ევროპარლამენტის წინაშე გამოსვლისას.
ფონ დერ ლაიენის თქმით, ტარიფებით კონფრონტაცია ევროპას არ დაუწყია, მაგრამ ყველა საშუალება აქვს თავისი ხალხის, კომპანიების, ინტერესებისა და კეთილდღეობის დასაცავად.
ევროკომისიის პრეზიდენტის თანახმად, ევროკავშირის ძლიერი მხარე არა მხოლოდ ვაჭრობა, არამედ ტექნოლოგიებიცაა და ევროპული ბიზნესი მნიშვნელოვანია აშშ-ის მსხვილი ტექნოლოგიური კომპანიებისთვის, რომლებიც შესაძლოა, საპასუხო ზომების სამიზნეთა შორის აღმოჩნდნენ.
ევროპარლამენტში გამოსვლისას ფონ დერ ლაიენმა კიდევ ერთხელ განაცხადა, რომ ტარიფები არის გადასახადი, რომელსაც ხალხი იხდის. ევროკომისიის პრეზიდენტს ჯერ კიდევ აქვს იმედი, რომ პრობლემას მოლაპარაკებების გზით მოაგვარებენ.
აშშ-ის პრეზიდენტი დონალდ ტრამპი აპირებს 2 აპრილიდან 25%-იანი საბაჟო გადასახადები დაუწესოს სხვადასხვა ქვეყანას, მათ შორის ევროკავშირის სახელმწიფოებს. ახალი ტარიფი ავტომობილებზეც უნდა გავრცელდეს.
პრეზიდენტის უფლებამოსილების მეორე ვადით შესრულების დაწყებიდან ორ თვეში, დონალდ ტრამპმა უკვე დააწესა ან დააანონსა არაერთი ტარიფი. მათ შორის, მარტიდან აამოქმედა 25%-იანი გადასახადი იმპორტირებულ ფოლადსა და ალუმინზე.
ტრამპი ტარიფებს მიიჩნევს სხვა სახელმწიფოებზე ზეწოლის, სავაჭრო ბალანსის დაცვისა და ამერიკის ეკონომიკის გაძლიერების საშუალებად. აშშ-ის პრეზიდენტის ოპონენტები აცხადებენ, რომ მსგავსი გადაწყვეტილებები რეცესიას და ფასების ზრდას გამოიწვევს.