აშშ-ში საგანგებო არჩევნებში ფლორიდაში რესპუბლიკელებმა გაიმარჯვეს, ვისკონსინში - დემოკრატებმა
სამშაბათს, 1 აპრილს, ფლორიდაში გამართულ საგანგებო კენჭისყრაზე - რომლითაც წარმომადგენელთა პალატის კანდიდატებს ირჩევდნენ - გამარჯვება მოიპოვა ორმა რესპუბლიკელმა პოლიტიკოსმა.
ამ არჩევნებს განიხილავდნენ აშშ-ის პრეზიდენტის, დონალდ ტრამპის და რესპუბლიკური პარტიის პოპულარობის პირველ გამოცდად მას მერე, რაც 2024 წლის ნოემბრის არჩევნების შედეგად თეთრი სახლი და კონგრესი მათ კონტროლს დაექვემდებარა.
წარმომადგენელთა პალატაში ორი ადგილი ვაკანტური გახდა მას მერე, რაც ტრამპმა თავის ადმინისტრაციაში თანამდებობებზე დანიშნა რესპუბლიკელი კონგრესმენები მაიკ უოლცი და მეტ გენცი.
ყურადღება კონცენტრირებული იყო ბრძოლაზე რესპუბლიკელ რენდი ფაინსა და დემოკრატ ჯოშ ვეილს შორის - ამ უკანასკნელმა თავისი კამპანიის დაფინანსებაზე დახარჯა 12-ჯერ მეტი, ვიდრე მისმა რესპუბლიკელმა ოპონენტმა. დემოკრატთა კანდიდატმა წააგო 14 პუნქტის სხვაობით - რამაც დემოკრატებს ოპტიმიზმის საფუძველი შეუქმნა, რადგან ნოემბერში ჩატარებულ არჩევნებზე რესპუბლიკელმა მაიკ უოლცმა 30-პუნქტიანი სხვაობით მოიპოვა გამარჯვება. რესპუბლიკელმა ჯიმი პატრონისმა თავისი დემოკრატი ოპონენტი დაამარცხა ოლქში, რომელსაც უწინ მეტ გენცი წარმოადგენდა. ორივე რესპუბლიკელ კანდიდატს აქტიურად უჭერდა მხარს პრეზიდენტი დონალდ ტრამპი.
კონსერვატიული ორიენტაციის ელექტორატით დასახლებულ ამ ოლქებში რესპუბლიკელების გამარჯვება მოსალოდნელი იყო - ამ ადგილებში რესპუბლიკელებს ტრადიციულად უჭერენ მხარს. ამ გამარჯვების შედეგად, წარმომადგენელთა პალატაში რესპუბლიკელებს ექნებათ 220 ადგილი, ხოლო დემოკრატებს - 213.
საგანგებო არჩევნების კიდევ ერთი ნიშანდობლივი შედეგია ვისკონსინის შტატის უზენაეს სასამართლოში დემოკრატთა კანდიდატის, სიუზან კრაუფორდის არჩევა. კრაუფორდმა დამაჯერებელი გამარჯვება მოიპოვა რესპუბლიკელ ბრედ შიმელზე, რომლის საარჩევნო კამპანიასაც მილიარდერმა ილონ მასკმა 25 მილიონი დოლარი დაახარჯა. სასამართლოს არჩევნების ისტორიაში ეს არის უპრეცედენტო მასშტაბის თანხა. გარდა ამისა, მასკი გამოვიდა წინადადებით, რომ 100 დოლარს გასცემდა შტატის ნებისმიერ მცხოვრებზე, რომელიც ხელს მოაწერდა ე.წ. "აქტივისტი მოსამართლეების" საწინააღმდეგო პეტიციას. რესპუბლიკელ კანდიდატს სოციალური ქსელებით მხარს უჭერდა ტრამპიც.
ვისკონსინის უზენაესმა სასამართლომ უნდა განიხილოს საჩივარი შტატში საარჩევნო ოლქების საზღვრებზე, რომელთა გამოც, ბევრის აზრით, რესპუბლიკელმა კანდიდატებმა კონგრესის არჩევნებში უპირატესობა მოიპოვეს.
შტატის უზენაეს სასამართლოში მოსამართლე კრაუფორდის არჩევით, უმრავლესობა დემოკრატების ხელში გადაინაცვლებს. მასკი და ტრამპის სხვა მომხრეები წერდნენ, რომ ვისკონსინში მარცხს შესაძლოა გამოეწვია რესპუბლიკელთა მარცხი წარმომადგენელთა პალატის 2026 წლის არჩევნებზე - ოლქების საზღვრებს თუ შეცვლიან, ამ შტატში, შეიძლება, მეტი დემოკრატი კონგრესმენი იყოს არჩეული.
ასევე სამშაბათს ჩატარებულ რეფერენდუმზე ვისკონსინის შტატის ამომრჩეველი მიემხრო, კონსტიტუციაში შევიდეს ამომრჩევლის მიმართ მოთხოვნა პირადობის დამადასტურებელი საბუთის ჩვენებაზე. ამომრჩეველი უკვე არის ვალდებული, აჩვენოს პირადობის მოწმობა, თუმცა ამ მოთხოვნის კონსტიტუციაში დამატება გაართულებს მის შეცვლას მომავალში. ამ ინიციატივას რესპუბლიკელები უჭერდნენ მხარს.
