რუსი ოფიცერი, რომელმაც ჯარისკაცი მოკლა, სავარაუდოდ, ფრონტზე გაიწვიეს
რადიო თავისუფლების პროექტ "იდელ. რეალიისთვის" ცნობილი გახდა, რომ 22 წლის რუსმა ოფიცერმა ალექსანდრ ემელიანოვმა, რომელმაც გასული წლის შემოდგომაზე საწვრთნელ პოლიგონზე 19 წლის წვევამდელი მოკლა ტყვიით, რუსეთის თავდაცვის სამინისტროსთან კონტრაქტს მოაწერა ხელი, უკრაინის ომში მონაწილეობის მისაღებად. ამის შესახებ გამოცემას დაღუპულის მეგობრებმა უთხრეს. ეს ირიბად დასტურდება იმითაც, რომ ემელიანოვის მიმართ შეწყვეტილია წვევამდელის სიკვდილის გამო აღძრული სისხლის სამართლის საქმე.
2024 წლის 21 ოქტომბერს რუსეთის პრიმორიეს ოლქში მდებარე მე-60 მოტომსროლელი ბრიგადის "ილინსკის" პოლიგონზე თავში გასროლით მოკლეს ვადიანი სამხედრო მოსამსახურე არტიომ ანტონოვი.
19 წლის ჯარისკაცი თათრეთიდან იყო. მისი ნათესავები დარწმუნებული არიან, რომ ვადიან მოსამსახურეთა მწკრივს ავტომატიდან ცეცხლი ბრიგადის ლეიტენანტმა მას შემდეგ გაუხსნა, რაც კონტრაქტზე ხელის მოწერაზე მორიგი უარი მიიღო.
ტელეგრამის არხ "თათრეთიდან დაღუპულების" ცნობით, 2025 წლის 29 მარტის მონაცემებით, უკრაინაში მიმდინარე ომში რესპუბლიკიდან გაწვეული 4500-ე სამხედრო დაიღუპა. ბოლო დაღუპულია 21 წლის ყაზანელი ალექსანდრ ბელომოევი.
2024 წლის 21 ოქტომბერს უსურიიისკში მდებარე მე-60 მოტომსროლელი ბრიგადის პოლიგონ „ილინსკზე“, მეცადინეობის დროს, „ლეიტენანტმა გადატენა ავტომატი და მიუშვირა პირად შემადგენლობას, რომელსაც ინსტრუქტაჟს უტარებდა. შემდეგ გამოჰკრა ჩახმახს თითი, გაისროლა რამდენიმე ტყვია, რომელთაგან ერთი თავის არეში მოხვდა ჯარისკაც ანტონოვს“, - ციტირებს მოკვლევის მასალიდან ამონარიდს ანტონოვის მეგობარი ივანი, რომლის სახელიც შეცვლილია.
როდესაც ვადიანი ჯარისკაცის ცხედარი პრიმორიედან თათრეთის მშობლიურ სოფელ ვერხნი უსლონში ჩაასვენეს, არტიომის ნათესავებმა და მეგობრებმა მოკლულის შუბლზე დაინახეს ტყვიის ნახვრეტი, სხეული კი სისხლჩაქცევებით ჰქონდა დაფარული.
ლეიტენანტი, რომელსაც ანტონოვის მისამართით გასროლაში ადანაშაულებენ, არის 22 წლის იჟევსკელი ალექსანდრ ემელიანოვი. მანამდე გამოცემა "ვოტ ტაკი" წერდა, რომ 2023 წელს იგი მოსკოვის უმაღლესი საერთო საჯარისო სასწავლებლის კურსანტი იყო, ხოლო კოლეჯში შესვლამდე სწავლობდა იჟევსკის სკოლა "ჰარმონიის" კადეტთა კლასში და რეგულარულად იმარჯვებდა კადეტთა კლასებს შორის გამართულ შეჯიბრებებში.
არტიომ ანტონოვის სიკვდილის შემდეგ, ლეიტენანტი ემელიანოვი დააკავეს, მან აღიარებითი ჩვენება მისცა და გამოძიებას უთხრა, რომ შემთხვევით ესროლა წვევამდელს. დაღუპულის ძმამ "მედიაზონას" განუცხადა, რომ ოფიცერი, რომელმაც ჯარისკაცს ესროლა, სამხედრო სამსახურს ჩამოაშორეს. მაგრამ უცნობია, შეუფარდეს თუ არა მას აღკვეთის ღონისძიება.
უსურიისკის საგარნიზონო სამხედრო სასამართლოს საიტზე გამოცემა "იდელ.რეალიიმ" აღმოაჩინა ცნობა, რომლის თანახმად, ლეიტენანტ ემელიანოვის წინააღმდეგ აღიძრა საქმე რუსეთის ფედერაციის სისხლის სამართლის კოდექსის 349-ე მუხლის მეორე ნაწილით - "იარაღის მოპყრობის წესების დარღვევა, რამაც ადამიანის გაუფრთხილებლობით სიკვდილი გამოიწვია". 2025 წლის 29 იანვარს საქმე შევიდა სასამართლოში. მაგრამ სასამართლო არ შედგა. 19 თებერვალს ემელიანოვის საქმის შესახებ სასამართლოს საიტზე გამოქვეყნებულ ბარათში გაჩნდა ჩანაწერი, რომ "საქმეზე წარმოება შეჩერებულია". მოკლული ჯარისკაცის, ანტონ ანტონოვის ახლობლებს ანონიმურმა წყაროებმა აცნობეს, რომ სასამართლოს გადაწყვეტილების მიზეზი გახდა ლეიტენანტ ემეილიანოვის მიერ კონტრაქტის გაფორმება თავდაცვის სამინისტროსთან, რაც უკრაინაში საომრად წასვლას უნდა ითვალისწინებდეს.
"იდელ.რეალიიმ" ვერ შეძლო საკითხის გასარკვევად ლეიტენანტ ემელიანოვთან დაკავშირება.
უკრაინის წინააღმდეგ ომის დროს, რუსეთის ხელისუფლებამ დაიწყო პატიმრების გაწვევა საბრძოლო მოქმედებებში მონაწილეობის მისაღებად. მოგვიანებით კი მიიღეს მთელი რიგი კანონები, რომლებიც განსასჯელებს საშუალებას აძლევს, სასამართლო პროცესისა და გამოძიების ნებისმიერ ეტაპზე, შესაბამისი თხოვნის დაწერის შემდეგ წავიდნენ ომში. კანონი არ ვრცელდება ტერორიზმისა და ექსტრემიზმის მუხლით ბრალდებულებზე.