Қазақстандағы өмір сапасының Стандарттары қандай болуы керектігі жөнінде
ЖСДП-ның стратегиялық мақсаты – заманауи әлемдегі өмір сапасы стандарттарын Қазақстанда енгізу, аз қамтылғандардың табысын тұрақты түрде ұлғайтып отыру, мемлекеттің тұрақты дамуына, сондай-ақ ел тұтастығына кедергі келтіретін кедейлер мен байлар арасындағы үлкен алшақтықты жою.
Жалпыұлттық социал-демократиялық партия (ЖСДП) өзінің сайлауалды бағдарламасында "Қазақстандықтардың өмір сапасының стандартын" енгізуді ұсынады. Онда адамның дұрыс тамақтануы, киім, дәрі-дәрмек, коммуналдық қызметтер, ақпарат, демалысқа қатысты қажеттіліктері ескеріледі. Зерттеу барысында анықталған азаматтардың әрбір жеке тобы үшін негізгі көрсеткіштерге қол жеткізу бойынша арнайы бағдарламалар әзірленетін болады.
Басқаша болуы мүмкін де емес. Еліміздің табиғи байлығын ескеретін болсақ, қазақстандықтар әлемнің үздік стандарттары деңгейінде өмір сүруі тиіс. Өйткені Қазақстан табиғи ресурстар қоры бойынша әлемде алтыншы, ауданы бойынша тоғызыншы, уран өндіру бойынша бірінші, ал уранның қоры бойынша екінші орында. Біз мұнай, газ, титан, магний, қалайы, уран, алтын және басқа да түсті металдар қоры бойынша әлемдегі ең бай елдердің біріміз.
Бүгінде қазақстандықтар өзін осы байлықтың иесі ретінде сезіне ме?
Күні кеше Астанада өткен дөңгелек үстел кезінде ЖСДП төрағасы Асхат Рақымжанов: "Біз ауылдарға жасаған сапарларымыз барысында нашар жолдар мен үзілген үміттерге куә боламыз. 1,5 мыңға жуық елді мекен интернеттің не екенін білмейді. Оны қойшы, 6 мыңнан астам адам электр желілеріне де қосылмаған. Олар фермаларда және шалғынды жайылымдарда өмір сүреді. Бүгінгі күні барлық аймақтар ауыз сумен қамтылып отыр деп те айта алмаймыз, өткізілген жерлердің өзінде судың сапасы көңіл көншітпейді. Бұл болса, біздің денсаулығымызға тікелей әсерін тигізетін фактор. Қай салада болмасын – білім беру, денсаулық сақтау, ТКШ, құрылыс – үкімет Тәуелсіздік алғаннан кейінгі 30 жылдан астам уақыт ішінде ешбір салада бір бағдарламаны қисынды аяқтаған жоқ", - деп атап кеткен еді.
ЖСДП Қазақстандағы кедейлікті есептеудің бірыңғай әдістемесін қабылдауды ұсынады. Дүниежүзілік банктің бағалауы бойынша, Қазақстан азаматтарының 15%-ы кедей. Бірақ ресми статистика халықтың тек 5,1%-ы күнкөріс деңгейінен төмен табыспен өмір сүретінін көрсетуде.
Билік белгілеген 100 доллардан сәл ғана асатын "күнкөріс деңгейінің" азаматтарымыздың нақты қажеттіліктеріне ешқандай қатысы жоқ және енді әлеуметтік саясаттың негізі бола алмайды!", – делінген партия бағдарламасында.
Тапсырыс беруші: ЖСДП Төрағасы Рақымжанов А.Н.