Алакөл жағасының ластығы мен қауіпсіздіктің сылбырлығы мәселесі қалай шешілмек
Президент Қасым-Жомарт Тоқаевтың Алакөл маңындағы әйгілі туристік аймақтың демалушыларды қарсы алуға дайындығы төмендігі жайлы айтқан сынынан кейін Абай облысы әкімінің орынбасары Серік Түленбергенов Мақаншы ауданына барды.
Демалыс үйлеріне айыппұл салынады
Бүгін көл басында шұғыл жиын өткізілді. Онда демалушыларға қолайлы жағдай жасау, санитарлық тазалық пен қауіпсіздік мәселелері талқыланды.
Енді көл жағасына құқық қорғау органдарымен бірге рейд жүргізіліп, тәртіптік шаралар күшейтілмек. Соның ішінде моторлы қайық иелерінің қызмет көрсетулері қатаң тексеріледі. Тазалық мәселесі қарастырылып, қоқыс тастаған сауда орындары мен демалыс үйлеріне айыппұл салынады.
— Алакөлдің Абай облысындағы жағалауына биыл ерекше көңіл бөлініп жатыр. Бұған дейін наурыз айынан бастап облыс әкімі Берік Уәли туристік орынға 3 рет барып, көшпелі жиындар өткізген. Алакөл жағалауына 2018 жылдан бері жөндеу жұмыстары жүргізілмеген. Осыны ескере отырып, облыстық бюджеттен 658 млн теңге қаржы бөлінді. Бұл қаржыдан Арбат алаңын жөндеуге 108,9 млн тг, жаңа қоғамдық кеңістік құруға 171,6 млн тг, жағалауды абаттандыруға 107,5 млн тг бағытталды. 25 киім ауыстыратын орын, 50 контейнер, 2 биотуалет орнатылды. 7 пирстің 3-еуі орнатылып, құтқару мұнаралары мен жағажайды жарықтандыру жұмыстары жүргізілді, — деп хабарлады Абай облысы әкімінің баспасөз қызметі.Фото: Абай облысының әкімдігі
Сонымен қатар жағалауда құтқару станциясының құрылысы басталды. Аталған станция Алакөл аумағында төтенше жағдайлардың алдын алу, салдарын жою, алғашқы медициналық көмек көрсетуге мүмкіндік жасау, адам өмірін сақтау мен жалпы қауіпсіздік деңгейін арттыруға бағытталған.
Сондай-ақ Қабанбай ауылында өрт сөндіру депосы салынып жатыр. Екі өрт сөндіру автокөлігіне арналған бекет Алакөл маңы мен аумағындағы өрт қауіпсіздігін қамтамасыз етуге арналған. Тазалық сақтау және тұрмыстық қалдықтарды шығару мәселесіне қатысты қосымша 100 қоқыс контейнері мен 75 урна орнатылған. Бүгінде жалпы 110 контейнер бар. Арбат аумағында тазалық жұмыстары әр 30 минут сайын, ал жағалауда күніне үш рет жүргізіледі. Қалдықтарды өңдеуге арналған полигон құрылысына жобалық-сметалық құжаттама әзірленіп жатыр, — делінген ақпаратта.
Биыл жағалаудағы санитарлық тораптар саны 8-ден 18-ге дейін көбейтіледі. Қазірдің өзінде 10-ы орнатылды.
— Электр энергиясы тапшылығын шешу үшін жаңа «Алакөл» қосалқы стансасы мен жоғары кернеулі желілер құрылысына жобалар дайындалды. Құрылыс жұмыстары 2026 жылдың қазан айында аяқталады. Қауіпсіздікті күшейту мақсатында құтқарушылар мен инструкторлар күнделікті кезекшілік жүргізіп жатыр. 5 құтқару мұнарасы, 6 адамнан тұратын арнайы топ жұмыс істеп тұр. Төтенше жағдайлар министрлігі және көлік инспекциясы жағажай аймағында су көліктеріне тұрақты рейдтер жүргізуде. Қазірдің өзінде 30 су көлігі тексеріліп, 12 әкімшілік хаттама толтырылған. Абай облысының әкімдігі Президент тапсырмасына сәйкес барлық шараларды жедел қолға алып, Алакөл жағалауындағы ахуалды жақсарту бойынша кешенді жұмыстарды жалғастыра береді, — делінген мәліметте.
Еске салсақ, осыған дейін Мемлекет басшысының халықтан келіп түскен көптеген шағымға байланысты Алакөл маңындағы әйгілі туристік аймақтың демалушыларды қарсы алуға дайындығы төмен екеніне Үкіметтің назарын аударғаны хабарланған.
Сообщение Алакөл жағасының ластығы мен қауіпсіздіктің сылбырлығы мәселесі қалай шешілмек появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.