Министрлік: Оңтүстік Кореяда заңсыз жұмыс істейтін қазақстандықтар ақпанның соңына дейін орала алады
Оңтүстік Кореяда заңсыз жұмыс істеп жүрген қазақстандықтар 2026 жылы ақпанның соңына дейін сол елден өз еріктерімен кете алады. Оларға айыппұл салынбайды және қайта елге кіруге тыйым салынбайды. Бұл жөнінде Қазақстан еңбек және халықты әлеуметтік қорғау министрлігі хабарлады.
Бұл бағдарламаның Оңтүстік Кореяда қылмыс жасап, елден күштеп шығарылуы тиіс шетел азаматтарына немесе 2025 жылдың 1 желтоқсанынан кейін елге заңсыз келгендерге қатысы жоқ.
Сол елде заңсыз жүрген қазақстандықтар аталған бағдарламаға қатысуы үшін сондағы көші-қон кеңселеріне төлқұжат және ұшу билетімен барып, өз еркімен кету туралы өтініш беруі керек.
Былтыр министрлік Оңтүстік Кореяда жалпы 15 мың қазақстандық тұрып жатқанын, шамамен 11 мыңы заңсыз жұмыс істеп жатқанын айтқан еді.
Министрліктің дерегінше, шетелде 126 мың қазақстандық жұмыс істеп жатыр. 102 мыңы – Ресейде, 15 мыңы – Оңтүстік Кореяда, шамамен 2 мыңы Ұлыбритания мен Еуроодақ елдерінде.
2024 жылы Қазақстан СІМ Оңтүстік Кореяда 30 мың қазақстандық барын айтқан.
Оңтүстік Корея Орталық Азияның еңбек мигранттары көп баратын елдер қатарына кіреді. Кореяға жұмыс іздеп кеткен қазақстандықтардың көбі ол елде Қазақстанмен салыстырғанда әлдеқайда көп табыс табуға болатынын айтады.
2014 жылы Астана мен Сеул виза келісіміне қол қойып, Қазақстан азаматтарына Оңтүстік Кореяда 30 күнге дейін визасыз жүруге рұқсат берілген. Осыдан кейін жұмыс іздеген қазақстандықтар Оңтүстік Кореяға кете бастаған. Бұған дейін сол жақта жүріп, қиын жағдайға тап болған қазақстандықтар құқықтары қорғалмайтынына шағымданған.