Нұрай Серікбайдың қазасына байланысты “Некеге мәжбүрлеу” бойынша қылмыстық іс тіркелді

Шымкентте кісі қолынан қаза болған 21 жастағы студент қыз Нұрай Серікбайдың қазасына байланысты “Некеге мәжбүрлеу” бойынша қылмыстық іс тіркелді. Бұл жөнінде жәбірленуші жақтың адвокаты Аянхан Омаров хабарлады.
“Қазіргі таңда ішкі істер министрлігінен арнайы комиссия келген, білікті полиция қызметкерлерінен жедел-тергеу тобы құрылған” деп жазды адвокаты.
Ол іс әділ әрі сапалы тергеледі деп үміттенетінін жеткізді.

Полиция қазір жас қыздың өлімін “Адам өлтіру” бабымен тергеп жатыр. Бұған дейін адвокат студент қыздың қазасын “аса қатыгездікпен адам өлтіру” бойынша қайта саралауды және сталкинг (аңду) бойынша да іс қозғауды талап еткенін айтқан. Осыған дейін қыздың өлімімен аяқталған оқиғаға қатысты “салғырттық танытқан” полиция қызметкерлеріне де қарсы іс қозғалған еді.
11 қаңтарда Шымкентте студент Нұрай Серікбай пышақ жарақатынан қаза болды. Желіде тараған видеода жас жігіттің, қызды пышақтап, қашып кеткені байқалады. 13 қаңтарда полиция 28 жастағы күдіктіні Шымкенттен 10 шақырымдай жерден ұстаған. Оның үстінен адам өлтіру бабымен іс қозғалған.
Күдікті — Нұрайдың танысы. Марқұмның жақындары "Курсив" сайтына Нұрай күдіктімен былтыр жазда тойда танысқанын айтқан. Көп өтпей жігіт сөз салып, қазан айында еркінен тыс алып қашқан. Бұл некеге қыз да, оның отбасы да қарсы болған. Қызды полиция көмегімен жігіттің үйінен алып кетіп, артынша арызданған. Бірақ күдікті қайта мазаламайтынын айтып уәде еткендіктен, кешірім берген. Алайда аңду, қорқытып-үркіту тоқтамаған. Бұл бойынша ата-анасы қалалық прокуратура мен полиция департаментіне арызданғаны айтылады. Нұрайдың туысы "прокуратура мен полиция бұл арыз бойынша жұмыс жүргізбеген" дейді. 11 қаңтар күні Нұрай дүкеннен ұн алуға шыққан оны үйін торуылдап жүрген күдікті ұстап алып, артынан қуып, пышақтап кеткен.
Жуырда Қылмыстық кодекске енген өзгеріс бойынша “қыз алып қашу” ("некеге мәжбүрлеу") “Адам ұрлау” бабына енгізіліп, ол бойынша жаза күшейтілген еді.