"Атажұрт" соты алдында белсенділер полиция қысымына шағымданды

29 қаңтарда жалғасатын "Атажұрт" соты алдында тіркелмеген ұйымға мүше азаматтар өздерін полиция бөліміне шақырып жатқанын хабарлады. Кейбірінің үйіне полиция да барған. Солардың бірі Алматы облысы Жамбыл ауданы Ұзынағаш ауылында тұратын – Шаймұхамбет Алдажаров. Оның сөзінше, жергілікті полиция бүгін күндіз үйіне келген.

"Екі көлік келді. Бірі – полиция көлігі, бірі – полицияныкы емес. Ол ар жағында тұрды. Сол басқарып тұрғандай көрінді. 29 қаңтар күні "сот жабық өтетінін білесіз бе?" деді. "Иә, білемін" дедім. "Ол жерге барып, айқай-шу шығарсаңдар, жаза қолданады. Соны ескертіп жүрміз. Түсіндіру жұмыстарын жүргізіп жатырмыз" деді. Әлгінде сот ашық болады деп бардық қой. Сүйтіп, жеке куәлігімізді беріп, тіркелдік. Ашық сот болады, кіресіңдер дегеннен кейін. Сол жеке куәлік деректерін бергендердің барлығын мазалап жүрген сияқты" деді Шаймұхамбет Алдажаров Азаттыққа.

Алдажаровтың Азатыққа жіберген видеосында оның үйінің маңында полиция көлігі мен тағы сұр түсті көлік тұрғаны көрінеді. Полиция сол көліктегілермен "ақылдасқаннан" кейін Алдажаровқа жақындап "тағы бір азамат бар екен, (аты-жөнін айтады) соны білесіз бе?" деп сұрайды. Ал Алдажаров оны танитынын, бірақ үйін білмейтінін жеткізеді.

Осыған ұқсас оқиға Алматы облысы Шелек ауылында тұратын "Атажұрт" мүшелерінің бірінде де болған. Ол бірнеше күннен бері өзін полицияға шақырып жақанын айтады.

"Не үшін шақырып отырсыздар? деп сұрасақ, айтпайды. "Келгеннен кейін түсіндіреміз" деп айтпай қойды. Бұған дейін үйімізге келіп, көршілерден біз туралы сұрапты" дейді аты-жөнін айтпаған ұйымның мүшесі. Ол әзірге, полицияға бармағанын айтты.

Айып тағылған "Атажұрт" белсенділерінің бірі Тұрсынбек Қабидің әйелі Оралхан Әбенқызы да Азаттыққа полиция келіп, ескерту жасағанын айтты.

"Жаңа маған да осы Қарасай аудандық полициясынан екі адам келіп кетті. Жұмыс орныма іздеп келіпті. 29 қаңтарда сот болады ғой. "Соған барасыз ба?", "Кіммен барасыз?", "Кімдер апарады?" дейді. "Күйеуім сотталып жатқанда қалай бармаймын, бала-шағамды ертіп апарамын" дедім. "Адам шақырып, топтасып бармаңыздар" дейді. "Мен ешкімге сен бар, сен барма деп билік жүргізбеймін" дедім. Кім барады, кім қояды, мен білмеймін ғой. Туыс-туғандары, жақын-жағаластары баратын шығар. Мен оларға барма деп қалай айтамын дедім" дейді ол.

27 қаңтарда Азаттық Алматы облыстық полиция басқармасының баспасөз қызметіне және кезекші бөліміне бірнеше рет хабарласты. Алайда телефон тұтқасын ешкім көтерген жоқ.

23 қаңтарда Талдықорғандағы Жетісу облысының қылмыстық істер жөніндегі мамандандырылған ауданаралық соты "Атажұрт" тіркелмеген ұйымының 19 белсендісінің ісін қарай бастаған. Сот жабық өтеді.

Алғашқы отырыста айыпталушылардың бірі Аян Қалымбек "қауіпсіздігім үшін" деп судьядан істі жабық өткізуді сұраған. Қалған 18 айыпталушы істің ашық қаралғанына қарсылық білдірмеген. Судья бір айыпталушының өтінішін қанағаттандырып, сот жабық болатынын жариялады. Жабық сот туралы шешімнен соң айыпталушылардың жақындары "бір адамның сөзі 18 адамның сөзінен артық болды ма?" деп наразылық танытты.

"Атажұрттың" 19 айыпталушысына "араздық қоздыру" бабы бойынша айып тағылып отыр. Айыптау актісінде белсенділер "масс-медианы пайдалана отырып, ұлттық алауыздық қоздыру, сонымен бірге қытай ұлтының өкілдеріне қатысты ұлттық ар-намысы мен қадір-қасиетін қорлау мақсатында ұйымдасқан түрде жиналған" деп жазылған. Мемлекет тағайындаған сараптама наразылық туралы видеоларда "ұлтаралық" немесе "ұлттық алауыздық қоздыру" белгілері бар деген қорытынды жасаған.

Ал белсенділердің адвокаты Шынқуат Байжанов істің саяси астары бар деп санайды. Оның пікірінше, белсенділер қытай халқына емес, Қытай билігінің қудалау саясатына қарсылық білдірген. Ал бұл араздық қоздыру емес – мемлекет саясатын сынау.

Белсенділерге тым ауыр айып тағылғанын бұған дейін кейбір депутаттар да айтқан.

Былтыр 13 қарашада Алматы облысы Ұйғыр ауданы Қалжат ауылы маңында қолына Қытай туы мен Қытай төрағасы Си Цзиньпиннің суретін ұстап шыққан бір топ адам Шыңжаңда түрлі желеумен ұсталып, "түзету лагеріне" қамалған қазақтарды босатуды және екі ел арасындағы визасыз режимді жоюды талап еткен еді.

Акция барысында олар Қытайға жұмыс істеуге кетіп, кейін сол жақта ұсталған Қазақстан азаматы Әлімнұр Тұрғанбайды елге қайтаруды Қытайдан талап еткен.

Ізінше белсенділер қамалып, әуелі әкімшілік жауапқа тартылды, кейін оларға қылмыстық іс бойынша айып тағылды.