Өскеменнің бұрынғы әкіміне қатысты сотқа дейінгі тергеу амалдары жүріп жатыр
Шығыс Қазақстан облысы әкімінің бірінші орынбасары, Өскемен қаласының бұрынғы әкімі Жақсылық Омарға қатысты сотқа дейінгі тергеу амалдары жүріп жатыр.
Ұлттық қауіпсіздік комитеті (ҰҚК) ақпаратты растады, бірақ жай-жапсарын түсіндірмеді. Комитет өкілдері шенеуніктің қандай бап бойынша тергеліп жатқанын, қандай да бір бұлтартпас шара қолданылғанын-қолданылмағанын айтпады.
Жақсылық Омардың ұсталғаны туралы ақпарат алғаш рет желіде 13 ақпанда пайда болған. Сол кезде жергілікті әкімдік "ақпараттан хабарсыз" екендіктерін айтып, "әкімнің орынбасары денсаулығына байланысты уақытша демалыс алды" деген.
Шенеунік немесе оның жақтастары тергеуге қатысты ешқандай мәлімдеме жасамады. Әлеуметтік желіде белсенді Жақсылық Омар Instagram-да соңғы рет 12 ақпанда жазба жариялаған. Онда ол аймақтың әлеуметтік саласындағы жұмыстары туралы жиналыс өткізгенін жазған еді.
45 жастағы Жақсылық Омар 2025 жылдың сәуір айынан бері Шығыс Қазақстан облысы әкімінің бірінші орынбасары қызметін атқарып келеді. Оның алдында шамамен бір жыл ШҚО әкімінің кеңесшісі болған. Ал 2018-2024 жылдары Өскемен қаласын басқарды.
Әр жылдары Алматы облысы әкімінің орынбасары, ШҚО әкімінің орынбасары сияқты түрлі лауазымды қызметтер атқарды. Мәдениет және ақпарат, қаржы министрліктері, "Қазақстан" телерадиокорпорациясы, "Арна медиа" холдингісінде қызмет істеген.