Москвада эки кыргызстандык киши колдуу болду
Маалыматка караганда, маркум эки жигитти 28-декабрдан бери туугандары издеп жаткан. Бири Өзгөн районунун 1981-жылы туулган тургуну Муратбек Маматалиев экени белгилүү болду. Экинчиси аны менен Москвада чогуу жашаган Искендер аттуу жаран болуп чыкты.
Жылдыз Осмонованын билдиришинче, 28-декабрда Искендер Муратбек Маматалиевди кайсы бир балдар менен жолугушууга шерик болуп барууну өтүнгөн. Алар Люблино метросундагы "Алмаз" деген кафесине барып,түнкү саат 3кө чейин отурган. Андан кийин белгисиз балдар келип, экөөн тең күч менен машинеге салып кеткен. Бул балдардын да кыргызстандыктар болушу мүмкүндүгү айтылууда.
Ушу тапта “Боордоштор” кайрымдуулук тобу маркумдардын бири Муратбек Маматалиевдин сөөгүн мекенине жөнөтүүгө жана анын операция боло турган жети жаштагы уулуна жардам чогултуп жатат. Ички иштер министрлигинин Орусиядагы өкүлчүлүгү окуя боюнча Москва облустук Тергөө комитети тарабынан орус мыйзамдарына ылайык кылмыш иши козголгон деп маалымдады.
Канга боелуп, кыйноо менен өлтүрүлгөн сөөктөр тартылган сүрөттөр жана анын Москванын Жуковский аймагынан табылганы жөнүндө маалымат 8-январда интернетте тараган болчу.