Депутаттар абакта жаткан Ормуковдон кабар алып чыгышты
Эл өкүлүнүн айтымында, Ормуков абактын оорукчандар үчүн камерасында кармалып жатат. Активисттин ден соолугу жакшы, түрмөнүн шартына, тамак-ашына жана абак жайдын кызматкерлерине даттанган эмес.
Токтошев белгилегендей, азиз активист болгону депутаттардан адвокат алууга мүмкүнчүлүгү жоктугун, күчтүү адвокат жалдоого көмөктөшүүсүн өтүнгөн.
Активист Темирлан Ормуков 29-мартта Бишкек шаардык ички иштер башкармалыгына чакырылып, камакка алынганы жатканда ичин устара менен тилип жиберген. Ал мындай кадамга өзүн куугунтуктоого каршылык иретинде барганын билдирген. Кийин “Кыргыз темир жолу” ишканасынын атайын ооруканасынын кардиология бөлүмүнө жеткирилип, дарыланып жаткан. Бишкек шаардык ички иштер башкармалыгынын кызматкерлери 5-апрелде аны ооруканада жаткан жеринен колуна кишен салып алып кетип, №1 тергөө абагына жеткирилген.
Темирлан Ормуков президентти сындаган ырынан “аймак аралык кастыкты козутуунун” белгилери табылганы үчүн жана “жалаа жабуу” боюнча айыпталган. Бул боюнча арызды Жогорку Кеңештин депутаты Дастан Бекешев жазган. Октябрь райондук соту Ормуковду "соттук отурумдарга келбей жатат" деген жүйө менен аны бир айга №1 тергөө абагына камоо тууралуу чечим чыгарган. Буга улай анын батири да камакка алынган.
Ормуков бул кылмыш иштерин саясий куугунтук деп баалап келет. Жогорку Кеңештин депутаты Дастан Бекешев мындай дооматты четке каккан. (ErN)