“Turkish Airlines” компаниясы Көчмөндөр оюндарына демөөрчүлүк кылат
Билдирүүдө айтылгандай, премьер-министр Мухаммедкалый Абылгазиев кечээ 20-июнда, оюндун кезектеги айлампасын өткөрүүгө даярдык көрүү боюнча кеңешме өткөрдү. Анда биринчи вице-премьер-министр Кубатбек Боронов уюштуруу, объектилердин курулушу, коопсуздукту камсыздоо жана демөөрчүлүк каражаттарды тартуу боюнча жүргүзүлүп жаткан иштер тууралуу маалымдады.
“Жакында ири түрк компанияларынын өкүлдөрү менен жолугушуу өттү. Жолугушуунун жыйынтыгы боюнча “Turkish Airlines” ири авиакомпаниясы Көчмөндөр оюндары тууралуу роликтерди көрсөтүүнү, авиабилеттерде жана учактардын бортторунда логотиптерди жайгаштырууну ишке ашырып, ошондой эле корпоративдик журналында макаланы жайгаштырат. Ошентип, биз кошумча дагы авиакомпаниянын жүргүнчүлөрү болгон беш миллионго жакын адамды камтый алабыз. Анын менен бирге авиакомпания демөөрчүлүк кылып, спорттук мелдештерге катышуучулар үчүн авиабилеттерге кыйла арзандатууларды жасайт”, – деген Кубатбек Боронов.
Премьер-министр Мухаммедкалый Абылгазиев бардык уюштуруу маселелерин белгиленген мөөнөттө аяктоону тапшырды. Өкмөт башчы мамлекеттик органдардын жетекчилерин алдыдагы оюндарды өткөрүүгө жоопкерчиликтүү мамиле кылууга чакырды.
Буга чейин өкмөт Көчмөндөр оюндарын өткөрүүдө ишкерлерден жардам сурап, бир катар фирмаларга кат жолдогон. Бул социалдык тармактарда сынга кабылган.
Оюн Ысык-Көлдө 2-8-сентябрда өтөт. Кыргызстанда биринчи жана экинчи "Көчмөндөр оюндары" 2014-жылы жана 2016-жылы Ысык-Көлдөгү Кырчын жайлоосунда өткөн. Анда негизинен ат оюндары, жаа тартуу, куш салуу боюнча мелдештер болуп, дүйнөнүн 40 өлкөсүнөн келген спортчулар катышкан. (ErN)