Трамп: Путин менен сүйлөшүү балким жеңил болот
АКШ президенти бүгүн НАТОнун саммитине жөнөр алдында орус президенти Путин тууралуу журналисттердин суроосуна жооп берди.
- Мен чын-чынында азыр муну айта албайм. Мага маалым болгондой, ал атаандаш. Менимче, Орусия менен, Кытай менен тил табышуу баары үчүн жакшы. Мен муну көптөн бери айтып келе жатам, - деди Дональд Трамп.
Трамп Европага сапарынын күн тартибинде НАТО, Британия жана Путин турганын белгилеп, бирок булардын ичинен Путин менен сүйлөшүү "балким баарынан жеңил болот” деп кошумчалады.
Президенттикке Дональд Трамп келгенден бери АКШ жана Орусия лидерлеринин алгачкы эки тараптуу саммити 16-июлда Хельсинкиде өткөнү турат. Трамп ага чейин 11-12-июлда НАТОнун Брюсселдеги саммитине катышып, Британияга визит жасайт.
Кремль президент Путин Трамп менен саммитте Орусия өзүнүн “ажырагыс бөлүгү” деп санаган Крымдан башка бардык маселени талкуулоого даяр экенин билдирген.
Трамп мурдараак "Украина, Сирия, шайлоо тууралуу сүйлөшөбүз. Биздин шайлоолорго башкалардын кийлигишүүсүн каалабайбыз" деген эле. Аннексияланган Крымды Орусиянын аймагы деп таануу боюнча суроого "көрөбүз" деп жооп берген.
Бирок АКШ президентинин бул сөзүнөн кийин Ак үй Крымдын 2014-жылдагы аннексиясын Вашингтон мурдагыдай эле тааныбай турганын жана Орусияга буга байланыштуу киргизилген экономикалык санкциялар күчүндө кала берерин ырастаган. (UE)