Талас жайлоосундагы өрттү өчүрүүгө Казакстандан да күч тартылды
Өзгөчө кырдаалдар министрлигинин басма сөз кызматы Кыргызстандын аймагында 1000 гектар жердин күйүп жатканын билдирди. Өрт үч жолу өчүрүлгөнүнө карабай, кайра тутанып кеткен. Буга казак тараптан (батыш) соккон шамал себеп болуп жатканы айтылууда.
Кыргыз өкмөтү Казакстанга кайрылып, өрткө каршы күрөшүүгө чакырууну пландап жатканын мурдараак вице-премьер-министр Кубатбек Боронов “Азаттыкка” билдирген. Анын айтымында, өрт чалган жерди көбү жайыт, 20 гектарга жакыны токой чарбасына таандык.
28-июлда башталган тилсиз жоого каршы Талас облусунун бир канча районунун өрткө каршы кызматтары катышууда. Ошондой эле, милициянын, токой чарбасынын, техникалык лицейдин кызматкерлери, жергиликтүү тургундар кошулган.
Өрт чыккан жер Манас районуна карайт. Аймакка 1-августтан тарта чукул кырдаал режими киргизилген. Кырсыктын себеби анык эмес. (SE)