Токтоболотов: Якутияда кыргызстандыктарды сабоо расмий тастыкталган эмес
«Зордуктоо үчүн айыпталып кыргызстандыктар кармалгандан бери социалдык тармакта таркаган уруп-сабоо же киши өлтүрүү боюнча маалыматтар расмий тастыктала элек. Расмий органдар жабыр тарткандардан кайрылуу түшпөгөнүн билдиришти».
Учурда социалдык тармактарда «Якутиядагы кыргызстандыктарды ур-токмокко алып, аларды кодулаган» видеотасмалар тарап жатат.
Кыргыз делегациясы Якутскиде Саха Республикасынын президентинин администрация башчысы, ички иштер министри, Якутскинин полиция башчысы жана тышкы байланыштар министри менен жолугушкан.
«Якутиянын бийлиги мыйзамдуулук сакталаарына убада берди» деп кошумчалайт Токтоболотов. Москвадагы кыргыз элчилиги, Мамлекеттик миграция кызматы менен ИИМ өкүлчүлүгүнүн кызматкерлери Якутскиде жергиликтүү бийлик өкүлдөрү менен жолугушууда. Бүгүн кыргыз диаспорасы менен да жолугушуу өтөт.
Якутиянын Тергөө комитетинин маалыматына караганда, 17-мартта аялды зордуктоо фактысына байланыштуу үч адам шектүү катары каралып жатат. Алардын бири кармалып, күнөөсүн мойнуна алганы, ал кыргызстандык жаран болуп чыкканы кабарланды.
Бул окуядан соң Якутск шаарынын тургундары нааразылык акциясына чыгышкан. (LzT/BTo)