Тажикстан: СOVID-19 жугузгандар 1500дөн ашты, 39 бейтап көз жумду
Тажикстандын Саламаттык сактоо министрлиги билдиргендей, 17-майга карата 1524 кишиден коронавирус аныкталды. Жугуштуу оорудан каза тапкандардын саны 39га жетти.
Тажик жарандарынын көпчүлүгү бийликтин расмий статистикасына ишенишпейт. Социалдык тармактарда катталгандар коронавирустан ажал тапкан жакындарынын, тааныштарынын, досторунун аты-жөнүн жарыялап жатышат.
Коңшу өлкөнүн Саламаттык сактоо министрлиги 490дон ашуун бейтап ооруканадан чыгарылганын билдирди. Алар толук сакайып чыкканы же андан ары үйүндө дарыланууга кеткени белгисиз.
Расмий маалыматка караганда, ооруканаларда 4196 киши дарыланууда.
12-майда Дүйнөлүк саламаттык сактоо уюмунун экспеттер миссиясынын жетекчиси Патрик О’Коннор Душанбедеги онлайн пресс-конференцияда Тажикстандагы эпидемиялогиялык кырдаал оорлошуп, вирус тез жайылып жатканын, жакынкы күндөрдөгү чаралар адам өмүрүн сактап калууда чечүүчү роль ойнорун эскерткен.
Кошуна өлкөдө коронавирустун алгачкы учуру тууралуу 30-апрелде расмий маалымдалган. Бирок өткөн айдын башынан эле борбор калаа Душанбеде, бир катар райондордо өпкөсү сезгенип, көз жумгандар көбөйгөн.
Тажик бийлиги эпидемиянын коркунучун көпкө этибарга албай, пандемия жарыялангандан кийин Ноорузга арналган массалык иш чаралар уюштурулуп, футбол боюнча чемпионат уланган.
Кийин вирустун тарашына каршы айрым чараларды көргөнү менен өкмөт карантин киргизген эмес.