Кыргызстанда коронавирус күчөшү ыктымалдыгы талкууланды
Коронавирус инфекциясы менен күрөш боюнча ыкчам штабдын бүгүн, 3-августтагы жыйынында республикадагы абал жана элди эмдөө маселеси талкууланды.
Министрлер кабинетинин төрага орун басары Эдил Байсалов өткөргөн жыйында вирустан ооругандардын саны азайууда деп айтылган. Саламаттык сактоо министрлиги ошону менен катар жарандарга эл көп топтолгон жерлерде беткап тагынууну сунуштады.
Дүйнөлүк саламаттык сактоо уюмунун маалыматы боюнча жакынкы айларда дүйнө мамлекеттери SARS-CoV-2 себепчи болгон бир же бир нече оорулардын көбөйүшү менен бет келип, анын каскагында ооруканага түшкөндөр жана каза тапкандардын саны көбөйүшү күтүлүүдө. Аны менен катар сасык тумоонун күчөшү жана башка вирустук оорулардын саны да артышы ыктымал.
Ошондон улам адамдар баары бир сактыкты кармап, эмделип, эл көп топтолгон жерде өзүн сактануу зарыл деген бүтүмгө келди республикалык штаб.
Коронавирус инфекциясына каршы эмдөө Кыргызстанда 2021-жылдын мартында башталган. Бүгүнкү күндө вакцинанын биринчи дозасын 1,5 миллиондон ашуун адам алган.
Кыргызстанга COVID-19га каршы 6 млн. 168 миң доза вакцина келген жана сатып алынган. Анын 3 млн. 571 443ү пайдаланылган. Жарактан чыгарылганы - 267 578. Калганы - 2 млн. 329 179 доза.
COVID-19дан республика боюнча каза тапкандардын саны 3000ге жакын.