Түркиядагы нааразылык акцияларын чагылдырган"Би-би-синин" журналисти депортацияланды
Бир нече күндөн бери Стамбулдун кызматтан четтетилген мэри Экрем Имамоглунун камалышына байланыштуу тутанган толкундоолорду чагылдырып келген "Би-Би-Синин" кабарчысы Марк Лоувен Түркиядан 27-мартта чыгарылды. Бул тууралуу аталган маалымат кызматы кабарлады.
"Бүгүн таңга жуук (27-март), Түркия бийликтери ""Би-Би-Синин" кабарчысы Марк Лоувен Стамбулдан чыгарылды. Аны бир күн мурда отелинен кармап кетишип, 17 саатка камашкан. Бейшемби таң эрте ага жазуу түрүндө "жарандык тартипке коркунуч туудуруп жатат" деген негиз менен чыгарыла турганы боюнча билдирүү берилди".-деп жазылат маалымат каражаты тараткан билдирүүдө.
Лоувен өзү алты жылдан бери Түркияда жашап келгенин жана депортацияланышы ага оор тийгенин жазды.
"Басма сөз эркиндиги жана обьективдүү маалымат берүү ар бир демократиянын негизги принциптерине кирет."-деп жазды ал.
Кийинки президенттик шайлоодо азыркы мамлекет башчы Режеп Тайып Эрдогандын негизги атаандашы болору күтүлүп жаткан Экрем Имамоглу 18-мартта кармалган. Ага жемкорлук жана опузалап акча талап кылуу сыяктуу бир катар айыптар тагылып жатканы маалым болгон. 54 жаштагы Имамоглу менен анын командасынын бир нече мүчөсү да кармалган. 23-мартта сот аны расмий камакка алуу чечимин чыгарган.
Имамоглунун камалышына каршылыгын билдирип Түркиянын ар кайсы аймактарында түмөндөгөн адам нааразылык акциясына чыгышты.
Аларды полиция суу бүркүп таркатууга аракет кылды. Бир нече күндөн бери акцияга чыккандардын арасынан 1400дөн көп адам кармалды. Алардын баары жана оппозиция Имамоглунун камалышынын саясий мүдөсү бар экенин айтып келишет.
Юстиция министрлиги Имамоглунун камалышына түрк бийлигинин, тактап айтканда Эрдогандын тиешеси жок экенин билдирүүдө.
Кармалгандардын арасында журналисттер да бар. Алардын ичинен француз агенттигинин сүрөтчү-журналисти жана бир нече түрк репортерлору бир нече күн камакта отургандан кийин бошотулду.