Тажик-ооган чек арасындагы кагылышуудан эки чек арачы каза тапканы кабарланды
Тажикстан менен Ооганстандын чек арасында, Шамсиддин Шохин районунда куралдуу кагылышуу болгонун "Озоди" радиосу кабарлады.
Радионун булактарынын айтымында, 24-декабрда чек араны ооган аткезчилери кесип өткөнү тууралуу маалымат түшүп, ок атышуунун жыйынтыгында Тажикстандын чек ара кызматынын бир нече кызматкери каза болуп, дагы бир нечеси жаракат алган.
Аталган медианын журналисттери каза болгондор 28 жаштагы Исматулло Курбонов жана 33 жаштагы Зиребон Наврузбеков экенин жазды.
Ошондой эле аткезчиликке шектүүлөрдүн бири кармалганы айтылды.
24-декабрда Кабулдун "Хашти Субх" гезити өз булактарына таянуу менен Ооганстандын аймагындагы ок атуудан Тажикстандын эки чек арачысы каза болгонун, ага жооп кайтарган тажик тарап эки куралчан кишини жок кылганын кабарлады. Аталган гезиттин булактарынын бири алар баңгизат менен шугулдангандар экенин белгилеген.
Бул окуя Тажикстан Ооганстан менен чектеш төрт чек ара пунктун ачкан күнү болгон. Тажик президенти Эмомали Рахмондун сайтында өлкө лидери бул чек ара пункттарын ачуу аземине онлайн катышканы жазылган.
Тажикстан менен Ооганстандын чек арасынын узундугу 1400 чакырымга жакын.
Ооганстандын Тажикстан менен чектеш аймагына соңку айларда эки жолу кол салуу болуп, анын кесепетинен Кытайдын беш жараны каза болгон.
Расмий Беэжин бул чабуулдарды айыптап, Тажикстандан жарандардын коопсуздугун камсыздоону талап кылган. (KS)