Рочиште за „Титаник“: автобуси од Италија полни со луѓе за гласање
Прислушуваните разговори беа за активностите за кампањата за изборите од 2011 година кои ги преземала тогашната партија на власт, со цел да, како што можеше да се слушне, да добијат убедлива победа на изборите.
Во еден од разговорите се слуша како Јанакиевски говори за носење на автобуси од Италија полни со луѓе, за кои калкулираа дека може да донесат околу 300 гласачи во шест автобуси. Јанакиевски на соговорник кого го ословува со „куме“ му вели дека на денот на изборите „нивните“ гласаат како војска уште од сабајле.
Во „бомбите“ Јанакиевски го брифираат за излезноста на изборите за кои, во една, му рекоа дека околу 95 проценти од членовите на ВМРО ДПМНЕ излегле да гласаат.
Поранешниот министер за финансии Зоран Ставрески и Миле Јанакиевски на денот на изборите бараат помош од еден соговорник да им заврши работа во ромското маало во Струмица додека друг му се жали на Миле дека му дошла финансиска полиција. Јанакиевски дава насока да се јават кај Сеат Кочан да му даде неколку фактури за да ја средат работата со финансиите.
Гордана Јанкуловска и Сашо Мијалков зборат за гласачи Македонци од Албанија кои гласат во Кичево, Ресен и Охрид и дека цела година се тера таа работа.
Во „Титаник“ обвинети се и поранешниот премиер Никола Груевски, како и Кирил Божиновски, Миле Јанакиески, Гордана Јанкулоска, Билјана Бришкоска Бошковски и други функционери на ВМРО-ДПМНР, кои се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања во 2011 година.