Алтернативната Нобелова награда за Грета Тунберг
![Алтернативната Нобелова награда за Грета Тунберг](https://gdb.rferl.org/D5B39B0A-2445-4FE7-84F3-3E2F1527B170_w800_h450.jpg)
Шведската активистка против климатските промени Грета Тунберг е една од добитничките на „алтернативен Нобел“, наградата „Рајт Лајвлихуд“, објави новинската агенција Асошиејтед прес. Шеснаесетгодишната Швеѓанка ја доби наградата за нејзините „инспиративни барања“ за итно дејствување против климатските промени, засновани на научни факти, наведуваат од Фондацијата која ја доделува наградата.
Тие исто така велат дека примерот на Грета, која е номинирана и за Нобелова награда, покажува дека секој има моќ да донесе промени, пренесува АП.
„Нејзиниот пример инспирираше и охрабри многу луѓе да бараат политичко дејствување“, велат од Фондацијата. Наградата „Рајт Лајвлихуд“, која е основана во 1980 година, оваа година ја добија и активисти кои се залагаат за зачувување на Амазонија, за мир во Западна Сахара и за правата на жените во Кина.