Стартува масовната вакцина низ Европа
Во Чешка, премиерот Андреј Бабиш прв ја прими вакцината во воената болница во Прага.
„Вакцината што пристигна вчера е надеж, надеж дека ќе се вратиме во нормален живот“, изјави Бабиш пред да ја прими вакцината.
Словачката претседателка Зузана Капутова и бугарскиот министер за здравство Костадин Ангелов беа меѓу првите политичари кои јавно беа вакцинирани со цел да се зајакне довербата на јавноста во безбедност и ефективност на вакцината.
Во Италија, земјата која беше најтешко погодена од пандемијата со ковид-19 во Европа, здравствените работници беа први на листата за имунизација.
„Овој датум ќе живее засекогаш со нас“ напиша на официјалниот твитер профил премиерот на Италија Џузепе Конте.
Германија почна до вакцинација на постарите граѓани
Политичарите и експертите предупредуваат дека ќе поминат неколку месеци пред вакцината да биде нашироко достапна за сите кои што сакаат да ја примат и дека во меѓувреме е потребно да се продолжи со основните мерки како носење маска, одржување дистанца и редовна дезинфекција на рацете.
„ Ни претстојат уште тешки месеци. Убав ден е денеска, но сепак мора да бидеме претпазлици, оваа вакцина е вистинскиот пат да се затвори оваа тешка сезона“ им рече на новинарите италијанскиот министер за здравство Роберто Сперанца.
Европската комисија соопшти дека склучила договор за повеќе од 2 милијарди дози вакцини од неколку производители. Европското регулаторно тело за лекови најави дека очекува процесот за одобрувањето на вакцината од американската компанија Модерна да заврши до 6 јануари.
Во европските земји беа евидентирани 16 милиони заразени до коронавирус и над 336 илјади смртни случаи поради компликации од ковид-19 од почетокот на пандемијата.