Пендаровски до Вартоломеј - Целосното заокружување на автокефалноста на МПЦ-ОА е од врвен национален интерес
Претседателот Стево Пендаровски денеска испрати писмо до Архиепископот Цариградски – Нов Рим и Вселенски Патријарх Вартоломеј во однос на признавањето на каноничноста на Охридската Архиепископија од страна на Вселенската Патријаршија.
Пендаровски во писмото оценува дека со примањето на МПЦ-ОА во канонско единство и во евхаристиско општење, била исправена „историската неправда нанесена врз Црквата и нејзините верници.“
„Вие ја исправате историската неправда нанесена врз Црквата и нејзините верници и ги исцелувате длабоките рани предизвикани од децениската изолација. Особено важно е што на нашата Црква и го признавате и нејзиниот историски континуитет со древната Охридска Архиепископија која низ вековите била прибежиште и извор на духовна сила и надеж за православните верници“, наведува Пендаровски во писмото.
Претседателот исто така изразува надеж и очекување за скорешно конечно решавање на административниот статус на МПЦ-ОА преку доделување на Томос за автокефалност од страна на Вселенската патријаршија,
Тој истакнува дека целосното заокружување на автокефалноста на МПЦ-ОА е од врвен национален интерес, бидејќи отвора можност „за нов и необременет духовен раст на Охридската Архиепископија и напредок и помирување во македонското општество“, наведува Пендаровски во писмото.
Вселенската Патријаршија ја призна Охридската Архиепископија за канонска, за автокефалност и натаму ќе се преговара
Светиот Синод на Вселенската Патријаршија, како што соопшти на 9 мај, ја отстрани „повеќедецениската шизма наложена врз Охридска Архиепископија, возобновена во лицето на МПЦ.“
Со тоа Вселенската Патријаршија ја призна црковната јерархија предводена од Архиепископот Стефан за канонска и валидна во сеправославниот свет и воспостави канонско и литургиско општење со неа, а наведе дека како име на оваа Црква го признава „Охридска“ имајќи го на ум, како област на нејзината јурисдикција, владението во границите на државата Северна Македонија.
Синодот на СПЦ одобри канонско единство со МПЦ-ОА
Вчера и Синодот на Српската православна црква СПЦ соопшти дека го поздравува прифаќањето на статусот на целосна внатрешна самостојност на Македонската православна црква - Охридска архиепископија (МПЦ-ОА).
Според соопштението на СПЦ, со ова се воспоставува заеднички литургиски и канонски дијалог, бидејќи се отстранети причините за нивното прекинување предизвикани од едностраното прогласување на автокефалност во 1967 година.
„Со воспоставување на единство на канонски основи и под услови на важење на канонскиот поредок на целиот простор на СПЦ, дијалогот за идниот и евентуалниот конечен статус на епархиите во Северна Македонија, не само што е можен, туку е и наменски, легитимен и реален“, се вели во соопштението на СПЦ.
Пендаровски во денешното писмо наведува дека, со оглед на историското и канонско право на Вселенската Патријаршија, очекува скоро конечно да биде решен административниот статус на МПЦ-ОА преку доделување на Томос за автокефалност.
„Целосното заокружување на автокефалноста на Нашата црква е од врвен национален интерес за нас бидејќи отвора можност за нов и необременет духовен раст на Охридската Архиепископија и напредок и помирување во македонското општество“, вели Пендаровски во писмото.