Британската кралица Елизабета под посебен лекарски надзор

Британската кралица Елизабета Втора е под медицински надзор во Балморал, откако лекарите се загрижија за нејзиното здравје, соопшти Бакингемската палата.

„По дополнителна проценка утринава, лекарите на кралицата се загрижени за здравјето на нејзиното височество и препорачаа таа да остане под медицински надзор“, се вели во соопштението.

Принцот Чарлс отпатува во Балморал, а таму отпатува и војвотката од Корнвол, додека војводата од Кембриџ е на пат.

Соопштението доаѓа откако 96-годишната кралица во средата се повлече од Тајниот совет и лекарите ја советуваа да се одмори.

Очигледно постои итна грижа за здравјето на кралицата - тоа е кажано многу поексплицитно од претходно и без никакво спомнување дека станува збор само за потешкотии во мобилноста, јавува Би-Би-Си.

Премиерката Лиз Трас рече дека „целата земја е длабоко загрижена“ од веста.

„Моите мисли и оние на луѓето низ нашето Обединето Кралство, се со нејзиното височество Кралицата и нејзиното семејство во овој момент“, додаде таа.

Кралицата во Балморал ја назначи Трас за премиерка, наместо да патува во Лондон на настанот.

За време на нејзиното 70-годишно владеење, кралицата обично одржуваше аудиенција со нејзиниот нов премиер во Бакингемската палата.

Таа од јули е на летен одмор во својот шкотски дом.

Лидерот на лабуристите Сер Кир Стармер рече дека е „длабоко загрижен“ од веста, додека шкотската прва министерка Никола Старџен рече дека е „длабоко загрижена“ и дека ги испраќа своите мисли и желби до кралицата. Првиот министер за Велс Марк Дрејкфорд ги испрати своите најдобри желби во име на народот на Велс.