Врховниот авганистански лидер нареди целосно спроведување на шеријатот
Врховниот лидер на Авганистан им нареди на судиите целосно да ги спроведат аспектите на исламскиот шеријатски закон, кои вклучуваат јавни егзекуции, каменување и камшикување, како и ампутирање на екстремитетите за крадците, изјави портпаролот на Талибанците, Забихула Муџахид.
Тој на Твитер напиша дека „задолжителната“ наредба на Хибатула Акуњада дошла откако тајниот лидер се сретнал со група судии, пренесе АФП.
Мула Хаибатула Акунџад, кој не е снимен или фотографиран во јавноста откако Талибанците се вратија на власт минатиот август, владее со декрет од Кандахар, родното место и духовен центар на движењето.
Талибанците ветија помека верзија на суровото владеење што го карактеризираше нивниот прв мандат на власт, од 1996 до 2001 година, но постепено ги скратија правата и слободите.
„Внимателно разгледајте ги досиејата на крадците, киднаперите и бунтовниците. Оние досиеја во кои се исполнети сите шеријатски (исламски) услови на худуд и кизас, вие сте должни да ги спроведете. Ова е одредба на шеријатот и мојата заповед, која е задолжителна“, изјавил Акунџад.
Худуд се однесува на прекршоци за кои, според исламскиот закон, се пропишани одредени видови казни, додека кизас се преведува како „одмазда во натура“, всушност „око за око“. Злосторствата во худуд вклучуваат прељуба и лажно обвинување некого за тоа, консумирање алкохол, кражба, киднапирање и грабеж на автопат, отпадништво и бунт.
Кизас опфаќа, меѓу другото, убиство и намерна повреда, но исто така им дозволува на семејствата на жртвите да прифатат компензација наместо казна.
Исламските научници велат дека злосторствата што доведуваат до казна за худуд бараат многу висок степен на докажување, вклучувајќи, во случај на прељуба, признание или сведочење на четворица возрасни муслимани.
Во последните 15 месеци особено жените видоа дека нивните тешко стекнати права исчезнуваат и тие се повеќе се истиснуваат од јавниот живот.
Повеќето женски државни службеници ги загубија своите работни места или добиваат безначајни пари за да останат дома, додека на жените исто така им е забрането да патуваат без машки роднина и мора да се покриваат со бурка или хиџаб кога се надвор од домот. На почетокот на ноември, Талибанците исто така им забранија на жените да влегуваат во паркови, саеми, спортски сали и јавни бањи.