Италија воведе данок од 40 отсто за екстра профитот на банките
Данок од 40 проценти за овогодишната неочекувана добивка за банките воведе италијанската влада. Според нивната одлука приходот од тој данок ќе им помогне на имателите на хипотекарни заеми и ќе ги намали даноците за граѓаните. Италијанскиот вицепремиер Матео Салвини изјави дека со оваа одлука ќе се оданочува профитот што банките го остваруваат од повисоките камати.
„Доволно е да се погледне профитот што го остварија банките во првата половина на 2023 година, како и резултатите од зголемувањето на каматните стапки на Европската централна банка, за да се разбере дека не станува збор за неколку милиони евра, туку околу милијарди“, изјави тој за Гардијан.
Според владината одлука новиот данок ќе опфати 40 проценти од таа разлика што е новата добивка на банките, затоа што годинава банките оствариле екстра профит од зголемувањето на каматите. Есктра профитот доаѓа од растот на каматите кои банките им ги наплатуваат за кредити, а ги намалија трошоците за каматите што им ги плаќаат на штедачите.
„Трошоците за кредити се удвоија за домаќинствата и економијата, но не и за нивните приходи“, додаде Салвини.
Минатиот месец најголемата италијанска банка Интеса Санпаоло го зголеми очекуваниот профит бидејќи заработи 2,27 милијарди евра нето повеќе отколку што предвидуваше во периодот април-јуни.