Ердоган до терористите - Нема да ја постигнете целта
Ердоган го соопшти ова за време на обраќањето на првата седница на турскиот парламент по тримесечната летна пауза, неколку часа откако бомбаш-самоубиец активираше експлозивна направа во центарот на Анкара.
„Злобниците кои го загрозуваат мирот и безбедноста на граѓаните не ги постигнаа своите цели и никогаш нема да ги постигнат“, рече Ердоган.
Бомбаш самоубиец активирал експлозивна направа во близина на зградата на Министерството за внатрешни работи.
Како што соопшти турскиот министер за внатрешни работи Али Јерликаја на социјалната мрежа Х, порано позната како Твитер, напаѓачот бил убиен кога бомбата била активирана, додека другиот напаѓач бил убиен во размена на оган со полицијата.
Во нападот полесно се повредени двајца полицајци.
Полицијата го блокираше пристапот до центарот на градот и ги засили безбедносните мерки.
Се уште нема информации за напаѓачите и нивните мотиви.
Турскиот министер за правда Јилмаз Тунч изјави дека е започната истрага за „терористичкиот напад“.
„Овие напади на никаков начин нема да ја попречат борбата на Турција против тероризмот“, рече Тунч во објавата на социјалната мрежа Х.
Осуди од НАТО, САД, соседите
Нападот во Анкара го осудија НАТО, САД, соседи на Турција од регионот.
Генералниот секретар на НАТО Јенс Столтенберг на платформата „Х“ напиша дека „НАТО е солидарен со Турција во борбата против тероризмот“.
Тој им посака на двајца повредени полицајци брзо и целосно закрепнување.
Амбасадата на Соединетите Американски Држави (САД) во Анкара и други странски мисии, исто така, објавија изјави во кои го осудија нападот.
Нападот го осуди Египет, кој ги нормализираше односите со Турција по една деценија тензии.
Осуди за нападот во Анкара пристигнаа и од министерот за надворешни работи на Северна Македонија, Бујар Османи. Тој во својство на претседавач со ОБСЕ го осуди денешниот терористички напад во Анкара.
„Северна Македонија силно ја поддржува Турција во нејзината борба против тероризмот“, напиша на Фејсбук министерот Османи.
Албанскиот премиер Еди Рама го осуди терористичкиот напад во Анкара и побара Европа да ја поддржи Турција во борбата против тероризмот.
Освен Рама, реагираше и министерот за Европа и надворешни работи, Игли Хасани.
Министерството за надворешни работи на Грција, преку платформата „Х“ го осуди терористичкиот напад во Анкара и изрази солидарност со турскиот народ и турската Влада.
Курдските и екстремно левичарските милитантни групи, како и Исламската држава, во минатото извршија смртоносни напади низ целата земја.