Се нормализира сообраќајот во Белград по синоќешните блокади

Утринава (30 јуни)постепено се нормализира сообраќајот низ Белград откако до доцна во ноќта студентите во блокада и граѓани блокираа голем број раскрсници, улици и мостови во главнипот град на Србија.
Во текот на ноќта, полицијата ги отстрани сите блокади на патиштата во Белград и сообраќајот може да функционира нормално, соопшто утрово Министерството за внатрешни работи на Србија.
Утрово во 3:44 часот на социјалните мрежи, студентите во блокада повикаа насобраните да се повлечат „мирно и без паника“ во случај на пристигнување или најава за пристигнување на специјални полициски единици.
Движењето „Крени-промени“, соопшти дека утрово полицијата уапсила граѓани во Белград кои, веројатно, учествувале во блокадите.
Студентите на Факултетот за организациски науки (ФОН) во блокада ги повикаа по полноќ граѓаните да им се придружат на студентите и да ги поддржат во блокадите и акциите на граѓанска непослушност, со препораки да се распределат во смени за да имаат ефект нивните акции.
„Блокадите мора да траат за да имаат ефект. Поделете се на смени, земете слободен ден или боледување. Кога не можете да бидете таму, донесете вода и храна на насобраните. Ако дојде полицијата, повлечете се без многу врева. Кога ќе си заминат, повторно блокирајте. Ние сме побројни“, објавија студентите во блокадата на ФОН на социјалната мрежа X и додадоа:
„Не плашете се затоа што сме заедно на улиците и тие не можат ништо да ни направат. На студентите им требате сега повеќе од кога било. Ние сме тука до крај. На тиранијата мора да и се застане на патот“, им порачаа студентите на граѓаните.

Партијата „Еколошко востание“ објави дека во иднина ќе ја бојкотира работата на српскиот Парламент и нејзините членови нема да учествуваат на седниците. Студентите во блокадата на Факултетот за организациски науки ги повикаа опозициските партии да ја бојкотираат работата на Собранието на Србија.
Кои се барањата на студентите?
На веб-страницата на „Студентска блокада“ беше објавен список од речиси 30 локации кои синоќа беа блокирани во главниот град, како и список од 22 градови во Србија каде што има барем една блокада.
Барањата на насобраните се распишување вонредни парламентарни избори, отстранување на кампот поставен во центарот на Белград на почетокот на март од страна на студентите кои се противат на блокадата на факултетот и ослободување на сите уапсени за време на немирите по студентскиот протест на плоштадот Славија на 28 јуни.
За РСЕ велат дека блокадата е „логично продолжение“ на студентскиот протест организиран на 28 јуни.
Сања, студентка на Правниот факултет во Белград, за РСЕ изјави дека дошла на протестот за да истрае во „борбата за правна, уредна држава“.
„Вчерашниот протест не заврши“, вели таа.
Повик за граѓанска непослушност
На Инстаграм страницата на студентите кои го блокираа Земјоделскиот факултет во Белград, беше објавена покана до граѓаните да се вклучат во граѓанска непослушност сè додека не се исполнат барањата.
Како што велат, граѓанската непослушност значи блокирање на раскрсници, боење на партиски простории, лепење налепници и постери и забавување на сообраќајот со возење велосипеди и џогирање по улиците во групи.
Тие ги повикаа граѓаните да „ги затрупуваат е-поштите и поштенските сандачиња на институциите што не работат правилно“, како и да „не плаќаат сметки до последен момент“ и „да ги плаќаат сметките на делови“.
Граѓанската непослушност вклучува истовремено подигнување пари од банкомати, колапс на фискалниот систем и плаќање во мали апоени.
Студентите во блокада побараа од Владата да испрати предлог до претседателот на Србија, Александар Вучиќ, за распуштање на Собранието и распишување вонредни избори.
Тие, исто така, побараа Владата да апелира до полицијата да го спречи собирањето на „студенти кои сакаат да учат“ во паркот Пионирски и плоштадот Никола Пашиќ.
За двете барања, тие поставија рок до 21 часот. на 28 јуни.
На 27 јуни, Вучиќ изјави дека „ултиматумот не е прифатен“.
Дел од демонстрантите и полицијата се судрија во центарот на Белград по официјалното завршување на студентскиот протест.
Министерот за внатрешни работи на Србија, Ивица Дачиќ, изјави дека по протестот на 28 јуни биле одведени 77 лица, а 38 од нив биле приведени.