Rekdal med krass pausekritikk: Poengdeling mot opprykksrivalen
Det enda 2–2 då 1. divisjon braka i gang med to av opprykksfavorittane i Aalesund og Lillestrøm. Aalesund-trenar Kjetil Rekdal likte ikkje det han såg frå laget før pause.
– Me har vore elendige, synest eg. Me har vore pinglete på alt, tør ikkje spele sjølv. Svake defensivt, eit veldig engsteleg Aalesund-lag. Viss me ikkje hevar oss, så kjem me til å tape, sa Rekdal til TV 2 i pausen.
Første omgang var prega av mykje mål. Tangotrøyene gjekk i leiinga etter fem minutt med scoring frå Claudio Braga.
Knappe ti minuttar seinare utlikna Eric Kitolano, men heimelaget gjekk opp i leiinga att med scoring frå David Jóhannsson.
Like før pause sørgde Thomas Lehne Olsen for at laga gjekk inn til pause på stillinga 2–2.
Rekdals menn fekk ein god start på annan omgangen ved å få tildelt eit straffespark, men Mads Hedenstad redda forsøket frå Paul Ngongo.
– Eg rekker å få opp foten der. Det er sjølvsagt deilig det. Poengdeling er vel for så vidt greitt, seier Hedenstad til TV 2 etter kampen. Det blei ikkje fleire mål i kampen og det enda 2–2.
– Viss du ser alt i alt så fortener me ikkje å vinne, såpass ærlege må me vere. Me blei betre i andre omgang, men me er framleis eit stykke frå det nivået me bør vere på, seier Rekdal. Andre resultat i 1. divisjon: Odd – Skeid 2–1 Start – Sogndal 2–1 Stabæk – Hødd 1–1 Egersunds IK – Mjøndalen 3–2 Kongsvinger – Åsane 1–1 Ranheim – Lyn 0–3