Prisveksten var litt høgare i desember

Prisane steig med 3,2 prosent i desember, samanlikna med desember i forfjor.

Det viser tal frå Statistisk sentralbyrå (SSB).

Det er ein betydeleg prisvekst på mat som er den store drivaren.

– Vi er vane til å sjå at matvareprisane fell frå november til desember som følgje av diverse tilbod og kampanjar på julevarer. Dette såg vi i år også. Vi såg likevel at prisane fall mindre i 2025 enn året før, seier Espen Kristiansen i SSB.

Også transport og energiprisar trakk prisveksten opp.

– Med mange som reiser heim til jul og fleire som nyttar ferien til å besøke solfylte strøk, såg vi ein oppgang i prisane på flyreiser i desember, seier Kristiansen.

Kjerneinflasjonen, som er prisendringar utanom energiprisar og avgifter, landa på 3,1 prosent.

Det er denne Noregs Bank ser mest på når dei skal setje renta. I sine prognoser venta sentralbanken at den skulle vere på 3 prosent i desember, men den landa ein tiandedels prosentpoeng høgare.

– Dette er ikkje i favør av snarlege rentekutt. Sentralbanken må trå varsamt framover. Vi ventar eitt rentekutt i år, i juni, seier rentestrateg Dane Cekov i Sparebank 1 Markets.