له امریکا څخه ایستل شوي ډیپلوماتان نن مسکو ته ورسېدل
د روسیې دولتي خبري اژانس تاس راپور ورکوي چې په واشنګټن کې د روسیې د سفارت ۴۶ کارکوونکي او د هغوی د کورنۍ غړي په لومړۍ الوتکه او په سیاتل کې د روسیې د جنرال قونسلګرۍ ۱۴ کارکوونکي په دوهمه الوتکه کې مسکو ته ورسېدل.
د امریکا متحدایالاتو ۶۰ روسي ډيپلوماتانو ته د وتلو امر کړی او په سیاتل کې د روسیې قونسلګري یې بنده کړې ده.
دا اقدام د هغو غبرګونونو یوه برخه ده چې یوشمېر هېووادونو د مارچ په څلورمه د بريتانیا په سالیزبوري ښار کې د یوه روسي استخباراتي مامور سرګي سکریپال او د هغه د لور له مسمومېدو وروسته د روسیې په وړاندې تر لاس لاندې نیولي دي.