امریکا او افغانستان په سریلانکا کې وروستۍ چاودنې وغندلې
د امریکا د بهرنیو چارو وزیر مایک پامپیو په ټویټر کې لیکلي چې امریکا د عيسويانو د اختر يا ایستر د جشن پرمهال په سریلانکا کې د یکشنبې ورځې بریدونه په کلکو ټکو غندي.
د افغانستان د بهرنیو چارو وزارت هم پرون یکشنبه په یوه اعلامیه کې په سریلانکا کې دغه چاودنې غندلي او له قربانیانو سره یې خواخوږي ښوولې ده.
پرون د یکشنبې په ورځ د سریلانکا د پلازمېنې کولمبو د ځينو هوټلونو او کليساګانو په شمول په ځينو سیمو کې څو تنظيم شوې چاودنې وشوې چې پهکې لږ تر لږه ۲۰۷ کسان ووژل شول او شاوخوا ٤٥٠ تنه نور ټپيان شول.
پرون سهار د شپږو چاودنو راپور ورکړل شوى چې دوې چاودنې بيا وروسته وشوې.
د سريلانکا دفاع وزير رووان ويجي واردينا دا بمي چاودنې د مذهبي افراطيانو تروريستي حمله وبلله.
دفاع وزير وايي، داسې ګومان کېږي چې ډېرې چاودنې به ځانمرګي بريدونه وي.
پوليس وايي، ١٣ مشکوک کسان نيول شوي دي. د دغو چاودنو مسؤليت تر اوسه چا نه دى منلى.
په سریلانکا کې دا له کورنۍ جګړې وروسته چې لس کاله مخکې پای ته ورسېدله تر ټولو خونړي بریدونه بلل شوي.