خوګیاڼی: د ننګرهار د هدفي وژنو د مخنيوي لپاره بحثونه شوي
تېره جمعه په بهسودو ولسوالۍ کې يو ديني عالم مولانا حنيف د نامعلومو وسله والو په حمله کې ووژل شو.
د والي وياند عطاالله خوګياڼي پرون ازادي راډيو ته وويل، والي په کابل کې د هدفي وژنو پر مخنيوي بحثونه کړي دي.
ده وویل:
"د ننګرهار والي شاه محمود مياخېل د ملي امنيت له عمومي رئيس، ملي دفاع او د کورنيو چارو له وزيرانو سره غونډې کړي چې د هغوى مرستې هم ترلاسه شي، په ننګرهار کې هم ټولې لارې چارې چې له امله يې ستونزه حلېږي، سنجول شوي دي."
تر دې مخکې د وري یا حمل په ٣٠مه د مرکز جلال اباد په يوه جومات کې يو قومي مشر د وسله والو په ډزو وژل شوى و.
په ننګرهار کې مدني فعالانو د هدفي وژنو پر زياتېدو اندېښنه ښوولې او له حکومت څخه يې د جدي اقداماتو غوښتنه کړې ده.