د ولسي جرګې له ځينو معترضو نوماندانو سره د حمدالله محب ژمنه
د دغو کانديدانو له ډلې نجيبې فايض هلمندۍ نن ازادي راډيو ته وويل، د ملي امنيت سلاکار حمدالله محب ورسره پرون په کتنه کې ويلي چې د دوى د غوښتنو د څېړنې لپاره به يوه کمېټه جوړېږي.
دې وویل:
"موږ پلان درلود چې نن يوناما ته خپل پرانيستى ليک وسپارو، خو تېره شپه حمدالله محب دلته راغى، زموږ خبرې يې واورېدې، ژمنه يې وکړه چې په دوو یا درېيو ورځو کې به کمېټه جوړه شي."
د ١٢ ولايتونو معترضو کانديدانو له دوو مياشتو راهيسې په کابل کې د تحصن خېمه وهلې ده.
دوى وايي، د ولسي جرګې په تېرو انتخاباتو کې يې حق خوړل شوى او د دوى شکايتونه دې واورېدل شي.