کینزي: د البغدادي د مړي پاتې برخې په سمندر کې ښخې شوي
بغدادي د اکتوبر پر ۲۶مه د امریکا د ځانګړو ځواکونو د عملیاتو په نتیجه کې په سوریه کې ووژل شو.
د امریکا ولسمشر اعلان وکړ چې البغدادي د خپل انتحاري واسکټ په چاودنه کې ووژل شو.
د امریکا د مرکزي قوماندانۍ مشر جنرال کینیت فرانک مک کينزي نن د اکتوبر په ۳۱مه ویلي چې د البغدادي د مړي پاتې برخې د هغه تر وژل کېدو ۲۴ ساعته وروسته په سمندر کې ښخې شوي دي.
پنتاګون د هغو عملیاتو په اړه لومړني حکومتي عکسونه او ویډویي کلپونه خپاره کړل.
په یوې ویډیو کې د دلتا ځواکونو کومانډویان ښکاري چې د هغې ودانۍ دېوالونو ته نږدې کېږي چې البغدادي او نور کسان یې پکې موندل شوي.
بله ویډیو پر هغو وسله والو هوایي برید ښیي چې هغوی ودانۍ ته د ورتلونکو امریکایي کومانډویانو پر هلیکوپترو ډزې کوي.
د امریکا پوځ دغه راز د عملیاتو تر ختمېدو وروسته هم پر هغې ودانۍ بمبار کړی، څو هغه وروسته د البغدادي په زیارت بدله نشي.
مک کینزي ویلي، امریکایي کومانډویانو په سوریه کې دننه له یوه ناڅرګند موقعیته عملیات پیل کړل چې البغدادي تر ودانۍ پورې د هلیکوپترې د یوه ساعت مزل واټن دی.
مخکې راپورونه ورکړل شوي چې البغدادي د خپل انتحاري واسکټ په الوځولو له ځانه سره درې ماشومان وژلي، خو جنرال مک کینزي وایي، وژل شوي ماشومان دوه تنه دي.
مک کینزي زیاتوي، څلور مېرمنې او دوه نارینه چې انتحاري واسکټونه یې اغوستي وو او نه تسلیېیدل، په ودانۍ کې دننه وژل شوي دي.
دا امریکایي جنرال وایي، په دې عملیاتو کې د پام وړ اسناد ترلاسه شوي، خو جزیات یې نه دي ورکړي.